तनहुँको देवघाट र गोरखाको सहिद लखन गाउँपालिका बीच भगिनी सम्बन्ध स्थापित
- खड्का पामी आले (देवघाट)
तनहुँको देवघाट र गोरखाको सहिद लखन गाउँपालिका बीच भगिनी सम्बन्धी स्थापित गरिएको छ । धार्मिक पर्यटनको महत्व बोकेका दुइ पालिकाका अध्यक्षहरुले सम्झौता पत्रमा हस्ताक्षर गरी भगिनी सम्बन्ध कायम गरेका हुन् ।
देवघाट गाउँपालिकाका अध्यक्ष दुर्ग बहादुर थापा र सहिद लखन गाउँपालिका अध्यक्ष रमेश बाबु थापा मगर बिच बिहीबार भगिनी सम्बन्ध सम्झौता पत्रमा हस्ताक्षर गरेका थिए ।
दुवै गाउँपालिकामा रहेका धार्मिक तथा साँस्कृतिक पर्यटनको प्रचार-प्रसार, प्रवर्द्धन र विकास गर्ने उद्देश्यले स्थापित उक्त भगिनी सम्बन्धले आन्तरिक तथा बाहृय पर्यटन बढाउने विश्वास लिएको छ ।
देवघाट गाउँपालिकाका अध्यक्ष दुर्ग बहादुर थापाको भ्रमण टोलीले गोरखा घैंरुङ पुग्दा, सहिद लखन गाउँपालिकाका अध्यक्ष रमेश बाबु थापा मगरले प्रथम सहिद लखन थापा मगरको प्रतीकात्मक तस्विर र मनकामना मन्दिरको फोटो हस्तान्तरण गरी स्वागत गरेका थिए ।
दुबै पालिकाले सामाजिक सद्भाव कायम गरी एक अर्काको गाउँपालिका क्षेत्र भित्र रहेका धार्मिक स्थलहरु, साँस्कृतिक ग्राम, ऐतिहासिक स्थलहरुका विषयमा प्रचार प्रसार गरी पर्यटन प्रवर्द्धनमा भगिनी सम्बन्ध कायम गरेका थिए ।
संसारका हिन्दु धर्मालम्बिहरुको पवित्र तिर्थस्थल देवघाटधाम देवघाट गाउँपालिकामा पर्दछ भने सबैको आस्थाको केन्द्र प्रसिद्ध मनकामना मन्दिर सहिद लखन गाउँपालिकामा पर्दछ । धार्मिक तथा साँस्कृतिक रुपमा महत्व बोकेका अन्य गाउँपालिकासंग पनि देवघाट गाउँपालिकाले आफ्नो भगिनी सम्बन्ध स्थापित गर्दै जाने अध्यक्ष थापाले बताए ।
