बन्दीपुर अस्पताल र केबलकार बीच सहकार्यको सम्झौता
बन्दीपुर : ऐतिहासिक तथा पर्यटकीय गन्तव्य बन्दीपुरमा अब स्वास्थ्य सेवा र यातायात पहुँच अझ सहज हुने भएको छ । स्थानीय स्वास्थ्य सेवा प्रवाहलाई प्रभावकारी बनाउन र क्षेत्रीय समन्वयलाई मजबुत पार्न बन्दीपुर अस्पताल र बन्दीपुर केवलकार एण्ड टुरिजमबीच औपचारिक सहकार्य सम्झौता गरिएको छ ।
नेपाल सरकारको स्वास्थ्य बीमा कार्यक्रममा सहभागी भई बन्दीपुर अस्पताललाई आफ्नो प्रथम सेवा विन्दुका रूपमा रोजेका बीमित सेवाग्राहीहरुले केबलकारको दुईतर्फी यात्रामा सहुलियत प्राप्त गर्ने भएको छ । उक्त सुविधा बन्दीपुर गाउँपालिका मात्र नभई, भानु, गोरखा, आँबुखैरेनी, व्यास क्षेत्रका सेवाग्राहीले पनि उपयोग गर्न सक्ने भएका छन् ।
त्यस्तै, बन्दीपुर गाउँपालिका अन्तर्गत कार्यरत चिकित्सक, स्वास्थ्यकर्मी तथा अन्य स्वास्थ्य सेवा प्रदायकहरूले समेत ठुलोढुंगादेखि बन्दीपुरसम्मको केवलकार यात्रा सहुलियत दरमा गर्न पाउने व्यवस्था मिलाइएको छ । यसले आपतकालीन स्वास्थ्य सेवा पु¥याउन सहज हुने तथा अस्पतालमा बिरामीको पहुँच सरल हुने बन्दीपुर केबलकार ऐन टुरिजमका का.मु प्रमुख कार्यकारी अधिकृत रोमनमान श्रेष्ठले बताए ।
सहकार्य अन्तर्गत, अस्पतालले आपतकालीन अवस्थामा उद्धार सेवा प्रदान गर्ने तथा केवलकार स्टेशनमा एम्बुलेन्स व्यवस्था गर्ने जिम्मेवारी लिएको छ । उता, केवलकार कम्पनीले बीमा कार्ड तथा सम्बन्धित कागजातको आधारमा सहुलियत दिने छ । बीमा कार्ड निष्क्रिय भएमा वा आवश्यक कागजात पेश नगरेमा सहुलियत नपाइने जनाएको छ ।
बन्दीपुर अस्पतालका मेडिकल सुपरिटेन्डेन्ट डा. अनिल गिरी र बन्दीपुर केवलकार एण्ड टुरिजम लिमिटेडका का.मु प्रमुख कार्यकारी अधिकृत रोमनमान श्रेष्ठबीच पाँच पृष्ठ लामो सम्झौता–पत्रमा हस्ताक्षर भएको छ ।
