भानुजयन्तीका अवसरमा रक्तदान र फलफूल वितरण
दमौली : आदिकवि भानुभक्त आचार्यको २१२औँ जन्मजयन्तीको अवसरमा विहीबार रक्तदान र विरामीलाई फलफूल वितरण गरिएको छ । भानु नगरपालिका–४ स्थित चुँदी रम्घामास्थित आदिकवि भानुभक्त जन्मस्थल विकास समितिको संयोजनमा आयोजित सप्ताहव्यापी कार्यक्रम अन्तर्गत रक्तदान र फलफूल वितरण गरिएको हो ।
जन्मस्थल विकास समितिले भानु नगरपालिका सेवा प्रवाह कार्यालयमा रक्तदान कार्यक्रम तथा दमौली अस्पतालमा बिरामीहरूलाई फलफूल वितरण कार्यक्रम गरेको थियो । नेपाल रेडक्रस सोसाइटी तनहुँ शाखाको प्राविधिक सहयोग र नेपाल रेडक्रस सर्कल भानुभक्त उपशाखाको समन्वयमा गरिएको रक्तदानमा कार्यक्रममा भानुका नगरप्रमुख आनन्दराज त्रिपाठीले आफैं रगत दान गरी शुभारम्भ गरेका थिए । उक्त अवसरमा १७ पिन्ट रगत संकलन गरिएको जनाइएको छ ।
यस्तै, दमौली अस्पतालमा उपचाररत ३५ जना बिरामीलाई फलफूल वितरण गरिएको छ । फलफूल वितरण कार्यक्रममा उपप्रमुख उमा गोतामे, प्रमुख प्रशासकीय अधिकृत गौतम भण्डारी, वरिष्ठ प्रशासकीय अधिकृत सुनिल पाण्डे, लेखा अधिकृत नवराज लौडारी, वडा नं. ५ का अध्यक्ष नहकुल अधिकारी, स्वास्थ्य शाखा प्रमुख डा. ऐश्वर्य भट्टराई, अस्पताल प्रमुख डा. परिवर्तन बराल लगायतले विरामीहरुलाई फलफूल वितरण गरेका थिए ।
आदिकवि भानुभक्तको जन्मस्थलले असार २५ देखि २९ गतेसम्म विविध कार्यक्रममार्फत भानु जयन्ती मनाउने तयारी गरेको छ। गण्डकी प्रदेशका मुख्यमन्त्री सुरेन्द्रराज पाण्डे समापन समारोहमा सहभागि हुने बताइएको छ ।
प्रभातफेरी, भानु प्रतिमामा माल्यार्पण, पञ्चकन्याद्वारा रामायण वाचन, मठ–मन्दिरमा पूजा, दीपावली, श्रद्धाञ्जली सभा, सांस्कृतिक प्रस्तुति र पुरस्कार वितरण लगायतका कार्यक्रम गरिने भएको छ ।
यस्तै, भानुजयन्तीका अवसरमा बाल–साहित्यिक चेतनालाई प्राथमिकता दिएर असार २६, २७ र २८ गते भानु नगरपालिका, भन्सार कार्यालय चुँदी तथा समितिको कार्यालय परिसरमा साहित्यिक तथा बालमैत्री कार्यक्रमहरू सञ्चालन गरिने भएको छ ।
समितिका कार्यकारी अधिकृत कृपाहरि लौडारीका अनुसार, खुला कविता प्रतियोगिता, चित्रकला, रचनापाठ, झाँकी प्रदर्शन, कविगोष्ठी लगायतका गतिविधि सञ्चालन गरिनेछ। यस्ता कार्यक्रमले बालबालिकामा साहित्यिक चेतना, भाषा–संस्कृति र राष्ट्रिय गौरवप्रति लगाव विकास गर्ने अपेक्षा गरिएको छ ।
