व्यास नगरपालिका : खेलकुदको माध्यमबाट पर्यटकीय क्षेत्रको प्रवर्द्धन

तनहुँको व्यास नगरपालिकाले खेलकुदको माध्यमबाट पर्यटकीय क्षेत्रको प्रचारप्रसार तथा प्रवर्द्धन कार्यक्रमलाई प्राथमिकता दिंदै आएको छ । प्रकृति, संस्कृति र पर्यटनलाई खेलकुदसंग जोडने उद्देश्यका साथ नगरपालिकाले म्याराथन प्रतियोगिता सञ्चालन गर्दै आएको छ ।

नगरपालिकाले सोमबार पत्रकार सम्मेलन गरी खेलकुदका माध्यमबाट तनहुँसुरको पर्यटन प्रवर्द्धन गर्ने उद्देश्यका साथ अन्तर्राष्ट्रिय नारी दिवसको अवसरमा दोस्रो व्यास नगर महिला खुल्ला हाफ म्याराथन र मानहुङ्कोट-पुलिमराङलाईको विकासका लागि फागुन २८ गते पाचौं नगर अल्ट्रा म्याराथन आयोजना गरेको जनाएको छ ।

यस अघि माघ १६ गते शहिद दिवसको अवसरमा व्यास नगर अल्ट्रा म्याराथनको आयोजना गर्दै आइएकोमा कोरोना कहरका कारण स्थगित गरिएकाले पुनःआयोजना गर्न लागिएको खेलकुद विकास समितिका अध्यक्ष एवं व्यास-५ का वडाध्यक्ष मोहनकुमार श्रेष्ठले बताए ।

त्यसैगरी यस अघिको बर्षमा नारी दिवसको दिन आयोजना गरिदै आएको व्यासनगर महिला खुल्ला हाफ म्याराथनलाई यसबर्षपनि निरन्तरता दिन लागेको व्यास नगर उपप्रमुख मिरा जोशीले बताइन् । दमौली स्थित व्यास गुफादेखि ऐतिहासिक तनहुँसुर दरवारसम्मको २१ किलोमिटर हाफ म्याराथनमा १५० धावकको अनुमान गरिएको जोशीले बताइन् ।

व्यासगुफादेखि अनसनचौतारी, दुर्गामन्दिर, भोर्लेटारचोक, गणेशमानचोक, वनकार्यालय, सफासडक हुँदै पृथ्वीराजमार्गको तालघरे, बाराहीरानी मार्गको रानीगाउँ, दरैपधेरा, पराजुलीचोक, पराशर मार्गको बेलटारी, खड्गकाली मार्गको चिसापानी, अर्चलचौर, धरमपानी, गङ्गलथोक, पत्यारचोक, चण्डिथान, गद्धीचौतारा हुँदै व्यास-११ स्थित ऐतिहासिक तनहुँसुर दरवारसम्म दौड हुनेछ ।

प्रतियोगितामा प्रथमलाई ४१ हजार ७८, द्वितीयलाई ३१ हजार ७८, तृतीयलाई २१ हजार ७८ र सान्त्वना ५ जनालाई जनही ११ हजार ७८ रुपैयाँ नगद, प्रमाणपत्र र मेडलबाट पुरस्कृत गरिने बताइएको छ ।

त्यस्तै, मानहुँकोटदेखि शहिद गाउँ पुलिमराङसम्मको ४४ किलोमिटर अल्ट्रा म्याराथनमा एकसय धावकको अनुमान गरिएको छ । म्याराथन मानहुँकोट सिद्ध मार्ग हुँदै अलैचे-चापाघाट-अनसन चौतारी-सफासडक-भोर्लेटार चोक-बैरेनी-दुम्सी-कलेस्ती-पाथ्रा-सत्रसय-बानियाँ डिही-बर्लाची-सोतीवेशी-बगुवा रिस्ती-बाहुनपोखरा हुँदै पुलिमराङमा पुगेर सकिनेछ ।

प्रतियोगितामा प्रथमलाई ८५ हजार ७८, द्वितीयलाई ६५ हजार ७८, तृतीयलाई ५५ हजार ७८ र सान्त्वना ५ जनालाई जनही १६ हजार ७८ रुपैयाँ नगद, प्रमाणपत्र र मेडलबाट पुरस्कृत गरिने बताइएको छ ।

खेलको माध्यमबाट नगरपालिकाको धार्मिक, ऐतिहासिक तथा पर्यटकीय क्षेत्र र शहिदहरुको गाउँ पुलिमराङको प्रबर्द्धन गर्ने उद्देश्यले बर्षेनी म्याराथनलाई प्राथामिकता राख्दै आएको नगरप्रमुख बैकुण्ठ न्यौपानेले बताए । उनले भने, ‘खुल्ला म्याराथन भएको हुनाले स्थानीय तथा राष्ट्रिय स्तरका धावकहरुको पनि सहभागिता हुन्छ।’ म्याराथनको खर्च व्यवस्थापनका लागि नगरपालिकाले २२ लाख रुपैयाँ बिनियोजन गरेको जनाएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर