तनहुँमा फूलपाती भित्र्याईयो
भञ्ज्याङ न्यूज
बडादसैंको सातौं दिन आज नेपाली परम्परा अनुसार घरघरमा फूलपाती भित्र्याइएको छ । यस अवसरमा तनहुँको सदुरमुकाम दमौलीमा पनि एक कार्यक्रमका बीच फूलपाती भित्र्याइएको छ ।
व्यास नगरपालिका, कालीभञ्जन गण -इ) चापाघाट, जिल्ला प्रहरी कार्यालय, तनहुँ उद्योग वाणिज्य संघ दमौली बजार इकाइ, विभिन्न संघ संस्था तथा स्थानीयको सहभागितामा बाजागाँजा सहित फूलपाती भित्र्याइएको हो ।
कालीभञ्जन गण (इ), जिल्ला प्रहरी कार्यालयबाट निकालिएको फूलको डोली दमौली स्थित वीपी वनवाटीकाको वेलको रुखमा पुजाअर्चना पश्चात बाजागाजा सहित दमौली बाजरको परिक्रममा गरी व्यास-४ स्थित कालिका मन्दिरमा विधिवत रुपमा भित्र्याइएको छ ।
घटस्थापनाका दिनदेखि वैदिक विधिपूर्वक दुर्गालाई आव्हान गरी पूजाआजा गरिएको स्थानमा घरघरमा स्थापना गरिएको नवदुर्गा एवं दसैंघरमा फूलपाती भित्र्याउने गरिन्छ ।
दुर्गा भवानीको प्रतिमा राखिएको दसैँघरमा फूलपातीको शुभसाइतका रूपमा उखु, अदुवा, केराको बोट, धानको बाला, बेलपत्र, दारिम, जयन्ती, अशोकको फूल तथा अन्य नयाँ पालुवासमेत विधिपूर्वक भित्र्याउने प्रचलन छ ।
नौ थरीको फूल वा पात हुने भएकाले यसलाई नवपत्रिका समेत भनिन्छ । यसलाई नवदुर्गाको पार्ष् अर्थात सहायकको रुपमा भित्र्याइने प्रचलन छ । केरामा ब्रहृमाणी, दारिममा रक्तदन्तिका, धानमा लक्ष्मी, हलेदोमा दुर्गा, मानवृक्षमा चामुण्डा, उखुमा कालिका, बेलपत्रमा शिवा, अशोकमा शोकरहिता र जयन्तीमा कात्तिकी देवीको आहृवान गरी पूजा गरिन्छ ।
यस्तै, हनुमान ढोका दरवारको दसैंघरमा गोरखा जिल्लाबाट ल्याएको फूलपाती भित्र्याउने परम्परा छ । गोरखाबाट धादिङको जीवनपुरसम्म दसैंघरका पुजारीसहित मगर जातिका ६ जनाले ल्याउने र त्यहाँबाट काठमाडौंको जमलसम्म यहाँबाट गएका ब्राहृमण जातिका ६ जनाले ल्याउने परम्परा रही आएको छ ।
जमलबाट हनुमानढोकासम्म निजामती सेवाका उच्चपदस्थ अधिकारी, गुर्जुका पल्टन, पञ्चेबाजा र साँस्कृतिक नाचगानसहितको लावा लस्करका साथमा फूलपाती ल्याउने गरिन्छ ।
