जेन जी समूहको आन्दोलन : ओली सरकार संकटमा, बूढानीलकण्ठमा गम्भीर छलफल
जेन जी समूहको आजको आन्दोलनमा उत्पन्न कहालीलाग्दो अवस्थाका कारण प्रधानमन्त्री केपी शर्मा ओली नेतृत्वको सरकार अप्ठेरोमा परेको छ । हालसम्म १५ जनाको ज्यान गएको छ भने एक सयभन्दा बढी घाइतेको विभिन्न अस्पतालमा उपचार भइरहेको छ ।
यता,नेपाली काँग्रेसकै नेताले गृहमन्त्रीको राजीनामा मागेका छन् । केन्द्रीय सदस्य प्रा.डा. गोविन्दराज पोखरेलले गृहमन्त्री रमेश लेखकको राजीनामा मागेका हुन् । सामाजिक सञ्जालमार्फत उनले तत्काल राजीनामा नदिए पार्टीले फिर्ता बोलाउनुपर्ने धारणा राखेका छन् ।
यता,मुलुकको पछिल्लो अवस्थाबारे छलफल गर्न काँग्रेस सभापति शेरबहादुर देउवाको निवास बूढानीलकण्ठमा केन्द्रीय पदाधिकारीहरुको बैठक बस्दैछ । आजको दुःखद घटनामा प्रहरी र गृहमन्त्री रमेश लेखकलाई बढी जिम्मेवार देखाउन थालिएको छ ।
आजै साँझ बालुवाटारमा मन्त्रिपरिषद्को बैठक राखिएको छ । जेन जी समूहको आन्दोलनमा भएको गोली प्रहार र धेरैको हताहतीबारे त्यसअघि काँग्रेस नेतृत्व र प्रधानमन्त्री ओलीबीच छलफल हुने बुझिएको छ । जन आस्था
