अविरल वर्षापछि तनहुँमा दुई स्थानमा घर जोखिममा, परिवार सुरक्षित स्थानमा सारियो
तनहुँमा अविरल वर्षापछि लेदो र बाढी घरमा पस्दा दुई स्थानका घर जोखिममा परेका छन् । जिल्ला प्रहरी कार्यालय तनहुँका अनुसार म्याग्दे गाउँपालिका–२ जामुने र घिरिङ गाउँपालिका–१ पुट्टारमा घर जोखिममा परेपछि प्रहरीले स्थानीय बासिन्दालाई सुरक्षित स्थानमा सारेको हो ।
म्याग्दे गाउँपालिका–२ जामुनेमा बुधबार राति करिब २ बजे अविरल वर्षाका कारण घरमाथिको बारीबाट बगरसहितको लेदो खिमादेवी विकको दुईतले पक्की घरमा पसेको थियो । लेदोका कारण घरको भुइँतलाको बीच कोठाको ढोका, झ्याल तथा पर्खालमा क्षति पुगेको प्रहरीले जनाएको छ ।
घटनाको जानकारी प्राप्त भएपछि प्रहरी टोली तत्काल घटनास्थलमा पुगेर जोखिममा रहेकी विकलाई छिमेकीको घरमा सुरक्षित स्थानान्तरण गरेको थियो । घटनामा मानवीय तथा अन्नपातमा क्षति नभएको प्रहरीले जनाएको छ ।
त्यस्तै, घिरिङ गाउँपालिका–१ पुट्टारस्थित गुहिय खोलामा आएको बाढीले खोलाको धार परिवर्तन गर्दा स्थानीयका कच्ची घरहरू जोखिममा परेका छन् । राति करिब ३ः३० बजे अविरल वर्षापछि आएको बाढी घरतर्फ पसेको थियो ।
बाढीको पानी स्थानीय भुमलाल दरैको घरसहित अन्य ३/४ वटा ढुंगा–माटोले बनेका कच्ची घरको तल्लो तलामा पसेको प्रहरीले जनाएको छ । घरभित्र पानी पसेपछि घरहरू जोखिममा परेका थिए ।
घटनाको सूचना प्राप्त भएपछि प्रहरी चौकी पुट्टारबाट प्रहरी टोली घटनास्थलमा खटिएको थियो । प्रहरीले जोखिममा रहेका घरका परिवारका सदस्यलाई सुरक्षित स्थानमा स्थानान्तरण गरेको जनाएको छ ।
दुवै घटनामा हालसम्म मानवीय तथा पशुचौपाय क्षति भएको विवरण प्राप्त नभएको जिल्ला प्रहरी कार्यालय तनहुँले जनाएको छ । लगातारको वर्षाका कारण ग्रामीण क्षेत्रमा लेदो, बाढी तथा खोलाको धार परिवर्तन हुने जोखिम बढेकाले स्थानीयवासीलाई सतर्क रहन प्रहरीले आग्रह गरेको छ।
