याम्पाफाँटका १५ दुग्ध किसान पुरस्कृत, सहकारीको वार्षिक १७ करोडको कारोबार
डुम्रे : तनहुँको बन्दीपुर गाउँपालिका–५, याम्पाफाँटका १५ जना दुग्ध उत्पादक किसान दूध बिक्रीका आधारमा पुरस्कृत भएका छन् । याम्पाफाँट दुग्ध उत्पादक सहकारी संस्थाले गत आर्थिक वर्षमा सहकारीमार्फत सबैभन्दा बढी दूध बिक्री गर्ने किसानलाई नगद पुरस्कारसहित सम्मान गरेको हो ।
सहकारीका अध्यक्ष काशीनाथ भट्टराईका अनुसार सबैभन्दा बढी दूध बिक्री गर्ने नमुना गाई फार्मका सञ्चालक पुष्पराज पौडेल प्रथम भएका छन् । उनले गत आर्थिक वर्षमा सहकारीमार्फत ८९ हजार १२८ लिटर दूध बिक्री गरेका थिए ।
त्यस्तै, ५१ हजार ८१२ लिटर दूध बिक्री गर्ने व्यावसायिक किसान काशीनाथ भट्टराई दोस्रो र ४४ हजार ४४४ लिटर दूध बिक्री गर्ने सुरज घिमिरे तेस्रो भए । दूध बिक्रीका आधारमा छविलाल घिमिरे चौथो, कमला पन्थ पाँचौँ, हरिप्रसाद भट्टराई छैटौँ र ओमप्रसाद लामिछाने सातौँ भए । यसैगरी इन्दिरा भट्टराई आठौँ, ऋषिराम भट्टराई नवौँ र रामनाथ भट्टराई दसौँ स्थानमा रहे ।
पुरस्कृत हुने अन्य किसानमा मुना न्यौपाने एघारौँ, सानुमाया सुनार बाह्रौँ, टकराज लामिछाने तेह्रौँ, इन्दिरा घिमिरे चौधौँ र ओमप्रकाश गुरुङ पन्ध्रौँ स्थानमा रहनुभएको छ । पन्ध्रौँ स्थानमा रहेका गुरुङले १८ हजार १८४ लिटर दूध बिक्री गर्नुभएको सहकारीले जनाएको छ ।
पुरस्कृत किसानलाई तीन हजारदेखि ११ हजार रुपैयाँसम्म नगद पुरस्कार प्रदान गरिएको अध्यक्ष भट्टराईले जानकारी दिए । दूध बिक्रीको परिमाणका आधारमा किसानलाई सम्मान गर्दा व्यावसायिक पशुपालनप्रति थप प्रोत्साहन मिल्ने सहकारीको अपेक्षा छ ।
याम्पाफाँट दुग्ध उत्पादनको महत्त्वपूर्ण केन्द्रका रूपमा परिचित छ । यहाँका किसानले पशुपालनलाई आम्दानीको प्रमुख आधार बनाउँदै आएका छन् । सहकारीमार्फत दूध संकलन तथा बिक्री हुँदै आएकाले किसानलाई उत्पादित दूध बजारसम्म पुर्याउन सहज भएको छ ।
सहकारीले गत आर्थिक वर्षमा १४ लाख लिटरभन्दा बढी दूध बिक्री गरी १७ करोड रुपैयाँभन्दा बढीको कारोबार गरेको जनाएको छ । दुग्ध उत्पादन र बजारीकरणमा सहकारीको सक्रियताले स्थानीय किसानको आयआर्जनसँगै क्षेत्रीय अर्थतन्त्रमा समेत योगदान पुर्याएको छ ।
याम्पाफाँटका किसानले व्यावसायिक पशुपालनलाई निरन्तरता दिँदै उत्पादन बढाउन सके स्थानीयस्तरमै रोजगारी र आम्दानीका अवसर विस्तार हुन सक्छन् । यसका लागि दूधको नियमित बजारीकरणसँगै पशु स्वास्थ्य सेवा, उन्नत नश्ल, दाना व्यवस्थापन र उत्पादन लागत घटाउने उपायमा ध्यान दिन आवश्यक देखिन्छ ।
