आँवुखैरेनीका लाभग्राहीको घरदैलोमै सामाजिक सुरक्षा भत्ता र स्वास्थ्य सेवा
आँवुखैरेनी : तनहुँको आँबुखैरेनी गाउँपालिकाले ज्येष्ठ नागरिक तथा सामाजिक सुरक्षा भत्ता प्राप्त गर्ने लाभग्राहीलाई घर तथा टोलमै पुगेर सामाजिक सुरक्षा भत्ता वितरण गर्दै आएको छ । भत्ता लिन बजारसम्म पुग्नुपर्ने, यातायातमा खर्च गर्नुपर्ने तथा लामो समय लाइनमा बस्नुपर्ने बाध्यता हटाउने उद्देश्यले गाउँपालिकाले घरदैलोमै भत्ता वितरण सुरु गरेको हो ।
गाउँपालिकाका अनुसार यसअघि सामाजिक सुरक्षा भत्ता लिन लाभग्राहीले यातायात खर्च गरेर बजारसम्म पुग्नुपर्ने र भीडभाडमा लामो समय बिताउनुपर्ने अवस्था थियो । ज्येष्ठ नागरिकलाई हुने यस्तो असहजतालाई ध्यानमा राख्दै गाउँपालिकाले जनप्रतिनिधि निर्वाचित भएपछि घरदैलोमै भत्ता वितरण गर्ने निर्णय गरेको थियो ।
सोही निर्णयअनुसार गाउँपालिकाले अहिले पनि विभिन्न वडा तथा टोलमा पुगेर सामाजिक सुरक्षा भत्ता वितरण गर्दै आएको छ । पछिल्लो समय भत्ता वितरणसँगै लाभग्राहीको स्वास्थ्य परीक्षण, निःशुल्क औषधि वितरण तथा स्वास्थ्य परामर्शसमेत उपलब्ध गराउन थालिएको छ । एकीकृत सेवाअन्तर्गत गाउँपालिकाले आँबुखैरेनी–६ का हिलेखर्क, जालभञ्ज्याङ, पुरलुङ लगायतका टोलमा पुगेर सामाजिक सुरक्षा भत्ता वितरणसँगै स्वास्थ्य सेवा प्रदान गरेको छ ।
भत्ता लिनकै लागि टाढा यात्रा गर्नुपर्ने बाध्यता हट्नुका साथै एउटै स्थानमा सामाजिक सुरक्षा र स्वास्थ्यसम्बन्धी सेवा प्राप्त हुँदा ज्येष्ठ नागरिक तथा अन्य लाभग्राहीलाई सहज भएको गाउँपालिकाले जनाएको छ ।
स्थानीय तहबाट प्रदान गरिने सेवालाई नागरिकको घरदैलोसम्म पुर्याउने अभ्यासले सेवा प्राप्तिका क्रममा हुने समय, खर्च र भौतिक कठिनाइ घटाउन सहयोग पुर्याउन सक्छ । सामाजिक सुरक्षा भत्तासँगै स्वास्थ्य परीक्षण र औषधि वितरणलाई जोडिएको यस्तो एकीकृत सेवाले विशेषगरी ज्येष्ठ नागरिकलाई स्थानीय तहमै आधारभूत सेवा उपलब्ध गराउने प्रयासलाई बल दिएको छ ।
