तनहुँमा असार १६ गतेसम्म निषेधाज्ञा : फेन्सी, किरानासहितका पसल तीन घण्टा खुल्ने (केके खुल्छन् ? आदेश सहित)
भञ्ज्याङ न्यूज
तनहुँ प्रशासनले असार १६ गतेसम्म निषेधाज्ञा लम्ब्याएको छ । जिल्ला कोभिड संकट व्यवस्थापन समितिको सिफारिस अनुसार प्रशासनले असार १६ गते राती १२ बजेसम्मका लागि निषेधाज्ञा जारी गरेको हो ।
जिल्ला कोभिड व्यवस्थापन समितिको बैठकले जिल्लामा कोभिड-१९ संक्रमणको जोखिम अझै कमी नभएको र समुदायमा व्यापक फैलिन सक्ने अवस्थालाई ध्यानमा राखि उक्त निषेधाज्ञाको आदेशलाई निरन्तरता दिन सिफारिस गरे अनुसार पुनः निषेधाज्ञा जारी गरिउको प्रमुख जिल्ला अधिकारी सागर आचार्यले बताए ।
कोभिड-१९ संकट व्यवस्थापन सम्बन्धमा व्यवस्था गर्न बनेको अध्यादेश, २०७८ को दफा ४ र स्थानीय प्रशासन ऐन, २०२८ को दफा ६ को उपदफा ३ ले दिएको अधिकार प्रयोग गरी यस अघि जारी गरिएको निषेधाज्ञाको आदेशलाई निरन्तरता दिदै जिल्ला भर लागु हुने गरी निषेधाज्ञा गरिएको प्रजिअ आचार्यले बताए ।
यस्तै, प्रशासनले यस पटकको निषेधाज्ञालाई केही सहज बनाउने भएको छ । फेन्सी, किराना तथा भीडभाड नहुने खालका व्यापार व्यवसायलाई सोमबारबाट दैनिक ३ घण्टा खोल्न दिने तयारी गरेको छ ।
व्यापारीहरुले आफूहरु संकटमा परेको भन्दै स्वास्थ्य मापदण्डको पालना गर्दै व्यवसाय खोल्न दिने वातावरण मिलाउन माग गर्दै आएका थिए । सोही अनुसार जिल्ला कोभिड संकट व्यवस्थापन समितिले सिफारिस दिएपछि अब प्रशासनले निषेध गरेका बाहेक सबै व्यवसाय खोल्न दिने निर्णय भएको सहायक प्रमुख जिल्ला अधिकारी चित्रांगत बरालले बताए ।
‘भिडभाड हुने भनेर निषेध गरेका बाहेकका पसल विहान तीन घण्टा खुल्नेछन्’, उनले भने, ‘अन्य व्यवसायका लागि हाल विहान ८ देखि ११ बजेको समय तोकिएको छ । यस अघि नै खुल्दै आएका अत्यावश्यक व्यवसायलाई बिहान ५ देखि ९ बजेसम्म खुल्न पाउने समय तोकिएको छ ।’
प्रशासनले स्वास्थ्य मापदण्डको कडाइ गर्न र नियम उल्लंघन भए कडा कारबाही गर्ने चेतावनी दिएको छ । यदि कोही कसैबाट यो आदेशको उल्लंघन भएमा कोभिड-१९ संकट व्यवस्थापन सम्बन्धमा व्यवस्था गर्न बनेको अध्यादेश, २०७८ तथा स्थानीय प्रशासन ऐन, २०२८ बमोजिम कारवाही हुने बताइएको छ ।
