बन्दीपुरमा चितुवा नियन्त्रणका लागि आहार सहितका पाँच वटा खोर राखियो
बन्दीपुर : तनहुँको बन्दीपुर गाउँपालिका–२ कुवादीका ६ बर्षीय उत्सव गुरुङको गत जेठ २६ गते साँझ चितुवाको आक्रमणमा परि मृत्यु भएपछि अहिले त्यस क्षेत्रमा चितुवा नियन्त्रणका लागि बाख्रासहितका फलामे खोर राखेर पासो थापिएको छ । सोही वडा स्थित सिद्धथान सामुदायिक बनमा नरभंक्षी चितुवालाई नियन्त्रण लिनका लागि बाख्रासहितका पाँच वटा खोरमा पासो थापिएको हो ।
चितवन राष्ट्रिय निकुञ्जका भेटेरिनरी प्राविधिक दिनेश ढकाल, राष्ट्रिय प्राकृतिक संरक्षण कोषका किरणराज रिजाल र बन्यजन्तु प्राविधिक थिरुलाल थारुको डार्टिङ्ग टोलीले त्यस क्षेत्रमा निगरानी बढाइरहेको छ । डार्टिङ्ग टोलीले चितुवा भेटेको अवस्थामा बेहोश बनाएर अन्यत्र स्थानान्तरण गर्ने योजना रहेको डिभिजन वन कार्यालय तनहुँका वन अधिकृत तथा सूचना अधिकारी राजकुमार श्रेष्ठले बताए ।
उनले भने, ‘डार्टिङ्ग टोलीले चितुवाको पदमार्ग र दिशा भेटिएकाले छिट्टै नियन्त्रणमा लिन सकिनेमा बिश्वास्त रहेको जनाएका छन् ।’ बन्दीपुरमा चितुवा आक्रमणमा परि चालु आबको साउनदेखि यता एघार महिनाको अवधिमा तीन बालबालिकाले ज्यान गुमाएका छन् । यसरी ज्यान गुमाउने बालक दुई र एक बालिका रहेका छन् । डिभिजन वन कार्यालयका अनुसार वि.सं. २०७४ फागुन ९ गतेदेखि आठ बर्षको अवधिमा १२ बालक र पाँच बालिका गरी १७ बालबालिकाले ज्यान गुमाइसकेका छन् ।
भानु, बन्दीपुर, आँबुखैरेनी, व्यास लगायतका पालिकामा चितुवा आक्रमणले मानवीय क्षति भएको छ । चितुवाको आक्रमणबाट आठ बर्षको अवधिमा २१ जना घाइते भएका छन् । घट्ना भएपछि स्थानीयबासीलाई साँझपख घरबाहिर ननिस्कन र सतर्कता अपनाएर बस्न र चितुवा देखिए तुरुन्त सम्पर्क गर्न समेत स्थानीयलाई आग्रह गरिएको डिभिजन वन कार्यालयले आग्रह गरेको छ ।
