तनहुँका चार पालिका कोरोना संक्रमणको उच्च जोखिममा (विवरण सहित)
भञ्ज्याङ न्यूज
तनहुँमा दोस्रो लहरको कोरोना भाइरस संक्रण दर अझै घट्न सकेको छैन । कोरोना संक्रमण रोकथाम तथा न्यूनिकरणका लागि भन्दै निषेधाज्ञा जारी गरिएतापनि जिल्लाका ४ पालिका कोरोना संक्रमणका हिसावले उच्च जोखिममा राखेको छ।
समुदायस्तरमै कोरोना संक्रमण तीव्र गतिमा फैलिएपछि व्यास नगरपालिका, शुक्लागण्डकी नगरपालिका, भिमाद नगरपालिका र बन्दिपुर गाउँपालिकालाई स्वास्थ्य कार्यालय तनहुँले संक्रमणको उच्च जोखिममा राखेको हो । जिल्लाका १० पालिकामध्ये यी ४ पालिकामा संक्रमण दर उच्च रहेको देखाइएको छ। यस्तै, भानु, भिमाद, घिरिङ, ऋषिङ, देवघाट र आँवुखैरेनीलाई मध्यम जोखिममा राखिएको छ ।
व्यासमा ७७९ जनाको ऐन्टिजिन र एक हजार १३२ जनाको पिसिआर प्रविधिबाट परीक्षण गरिएकोमा एक हजार ८२ जनाको रिपोर्ट पोजेटिभ आएको छ । यी मध्ये ९०९ जनामा संक्रमण निको भएको स्वास्थ्य कार्यालय तनहुँका प्रमुख शंकरबाबु अधिकारीले जानकारी गराए । त्यस्तै, शुक्लागण्डकीमा ४७८ जनाको ऐन्टिजिन र एक हजार ५४३ जनाको पिसिआर प्रविधिबाट परीक्षण गरिएकोमा ९३५ जनाको रिपोर्ट पोजेटिभ आएको छ । यी मध्ये ७७५ जनामा संक्रमण निको भएको छ ।
भिमादमा ५५२ जनाको ऐन्टिजिन र ३५३ जनाको पिसिआर प्रविधिबाट परीक्षण गरिएकोमा ४३१ जनाको रिपोर्ट पोजेटिभ आएको छ । यी मध्ये ४०७ जनामा संक्रमण निको भएको कार्यालयको तत्थांकमा उल्लेख गरिएको छ । बन्दिपुरमा ३९७ जनाको ऐन्टिजिन र २६१ जनाको पिसिआर प्रविधिबाट परीक्षण गरिएकोमा २२६ जनाको रिपोर्ट पोजेटिभ आएको छ । यी मध्ये २०४ जनामा संक्रमण निको भएको छन् ।
भानु नगरपालिकामा ८२ जनाको ऐन्टिजिन र ३८४ जनाको पिसिआर प्रविधिबाट परीक्षण गरिएकोमा २३४ जनाको रिपोर्ट पोजेटिभ आएको छ । यी मध्ये २०८ जना निको भएका छन् । त्यस्तै, म्याग्दे गाउँपालिकामा ४५ जनाको ऐन्टिजिन र ८९३ जनाको पिसिआर प्रविधिबाट परीक्षण गरिएकोमा ३०१ जनाको रिपोर्ट पोजेटिभ आएको छ । यी मध्ये २३५ जना निको भएको छन् ।
घिरिङ गाउँपालिकामा १६१ जनाको ऐन्टिजिन र १७८ जनाको पिसिआर प्रविधिबाट परीक्षण गरिएकोमा १२६ जनाको रिपोर्ट पोजेटिभ आएको थियो । यी मध्ये ११९ जना निको भएका छन् । रिसिङ्ग गाउँपालिकामा ४५ जनाको ऐन्टिजिन र ८९३ जनाको पिसिआर प्रविधिबाट परीक्षण गरिएकोमा ३०१ जनाको रिपोर्ट पोजेटिभ आएको छ । यी मध्ये २३५ जना निको भएको छन् ।
देवघाट गाउँपालिकामा १९५ जनाको पिसिआर प्रविधिबाट परीक्षण गरिएकोमा ४२ जनाको रिपोर्ट पोजेटिभ आएको र संक्रमितमध्ये ३९ जना निको भएको छन् । आँबुखैरेनी गाउँपालिकामा ११२ जनाको ऐन्टिजिन र १५७ जनाको पिसिआर प्रविधिबाट परीक्षण गरिएकोमा ७४ जनाको रिपोर्ट पोजेटिभ आएको छ । यी मध्ये ७० जना निको भएका छन् ।
कार्यालयका अनुसार १० वटै पालिकामा ३ हजार ५३१ ऐन्टिजिन र ५ हजार २४८ नमुना पिसिआर परीक्षण गरी ८ हजार ७७९ जनाको कोरोना परीक्षण गरिएकोमा ३ हजार ५१७ जनाको रिपोर्ट पोजेटिभ आएको छ । ‘कुल संक्रमितमध्ये ३ हजार २४ जना निको भएका छन् भने जिल्लामा अहिले ४०४ जना संक्रिय संक्रमित छन्’, कार्यालयका प्रमुख अधिकारीले भने, ‘संक्रिय संक्रमितमध्ये होम आइसोलेशनमा ३९३ जना र ११ जना आइसियु, एचयुडि र संस्थागत आइसोलेशनमा उपचारत छन् ।’ दोश्रो लहरको कोरोना संक्रमणबाट ८९ जनाको मृत्यु भएको छ ।
जिल्लका १० वटै पालिकाका २२ हजार २४० जनाले पहिलो मात्राको खोप लगाइसकेका छन् भने ५ हजार २२९ जनाले मात्र दोश्रो मात्राको खोप लगाउन पाएको प्रमुख अधिकारीले बताए । अत्यावश्यक सेवाका लागि भनेर जिल्लामा १९५ वेडको १२ वटा कोभिड अस्पताल, ७ वटा आइसियु कक्ष, ४ वटा भेन्टिलेटर, ३७८ वटा अक्सिजन सिलिन्डर र २९ वटा एम्बुलेन्सको व्यवस्थापन गरिएको छ ।
यस्तै, जिल्ला प्रशासन कार्यालय निषेधाज्ञालाई खुकुलो बनाउँदै लग्दा सार्वजनिक यातायातका साधान समेत सञ्चालनमा आउन थालेका छन् भने लगभग सबै क्षेत्र अहिले खुल्दै जाँदा जनजीवन सहज बन्दै गएको छ । निषेधाज्ञा खुकुलो बन्दै गएपछि नागरिकस्तरबाट लापरवाहीजन्य गतिविधि भएको र व्यवसायीहरुले पनि स्वास्थ्य सुरक्षाका मापदण्ड पालनामा लापरवाही गर्दा कोरोना संक्रमण फैलने खतरा बढ्दै गएको छ ।
