व्यासमा पर्यटकीय स्थलको भिडियो प्रतियोगिता
भञ्ज्याङ न्यूज
अन्तर्राष्ट्रिय युवा दिवसको अवसरमा व्यास नगरपालिका, व्यास नगर युवा परिषद्को आयोजनामा व्यास नगरका पर्यटकीय स्थलको पर्यटन सम्बन्धी भिडियो प्रतियोगिता गरिएको छ । छ समुहले भाग लिएको सो संक्षिप्त भिडियो प्रतियोगितामा बिकल श्रेष्ठको समुह प्रथम, किरन थापाको समुह द्धित्तीय र पवन सिग्देलको समुह तृत्तीय भएका छन् । प्रतियोगिताका प्रथम, द्धित्तीय र तृतीयलाई क्रमशः १० हजार, ७ हजार र ३ हजार रुपैयाँ पुरस्कार स्वरुप प्रदान गरिएको छ ।
विजेतालाई पुरस्कार प्रदान गर्दै व्यास नगरपालिकाका उपप्रमुख मीरा जोशीले युवाहरुको प्रतिभालाई प्रस्फुटन गर्ने माध्यमका रुपमा भिडियो प्रतियोगिता उत्कृष्ट रहेको चर्चा गर्दै आगामि दिनमा यस्ता प्रतियोगितालाई निरन्तरता दिने बताइन् । प्रतियोगिताको उद्घाटन गर्दै नगरप्रमुख एवं व्यास युवा परिषद्का अध्यक्ष वैकुण्ठ न्यौपानेले पर्यटकीय क्षेत्रको विकास नगर क्षेत्रको विकासको लागि महत्वपूर्ण विषय भएको चर्चा गरे । उनले पर्यटकीय क्षेत्रको पहिचानका लागि युवाहरुले शसक्त भएर काम गर्न सक्नुपर्ने बताए ।
व्यास नगरपालिकाका प्रवक्ता एवं वडा नं ५ का वडाध्याक्ष मोहन कुमार श्रेष्ठ र वडा नं १४ का वडाध्यक्ष काजिमान श्रेष्ठले प्रतिष्पर्धाले कमि कमजोरीलाई सुधारेर अगाडि बढ्न प्रेरणा मिल्ने उल्लेख गर्दै युवाहरु सशक्त भएर अगाडि नबढेसम्म विकासको गति मजबुत नहुने बताए ।
पर्यटनविद हरिसं गुरुङको संयोजकत्वमा सदस्यद्वय डा. शेषरमण न्यौपाने र विना कैनी रहनुभएको निर्णायक समितिले निकालेको नतिजा अनुसार कार्यक्रम समापनका अवसरमा सहभागि लियो क्लब अफ तनहुँ, रोट्र्याक्ट क्लब अफ वेदव्यास र आश्वीन श्रेष्ठ सहितको समुहलाई पनि सम्मानित गरिएको थियो ।
प्रतियोगिताका अवसरमा सहभागि प्रतियोगिहरुले व्यास नगरपालिका भित्रका धार्मिक ऐतिहासीक तथा पर्यटकीय स्थलहरुको विश्लेषणसहित भिडियो प्रस्तुति गरेका थिए ।
