लमजुङमा मध्यरात मर्स्याङ्दीमा बस खस्दा चालक बेपत्ता
लमजुङको मर्स्याङ्दी गाउँपालिका ७ मा मध्यराति मर्स्याङ्दीमा बस खस्दा चालक बेपत्ता भएका छन् । चितवनको भरतपुर महानगरपालिका १३ घर भई हाल ससुराली लमजुङको मर्स्याङ्दी गाउँपालिका ७, ङादी बस्दै आएका अन्दाजी ४० वर्षीय खेमबहादुर भुजेल बेपत्ता भएको प्रहरीले जनाएको छ ।
प्रहरीका अनुसार बेंशीसहरबाट शनिबार यात्रु लिएर गएको ध १ ख ३७२ नम्बरको बस मर्स्याङ्दी गाउँपालिका–९, सिम्पानी बगैंचामा बिग्रिएको थियो । बस मर्मत गरी ङादीतर्फ जाने क्रममा शनिबार राति साँढे १२ बजेतिर बस मर्स्याङ्दीमा खसेको हुन सक्ने खुदी प्रहरी चौकी प्रमुख सई प्रेमप्रसाद शर्माले बताए ।
उनका अनुसार बस सडकबाट करिब १५–२० मिटर तल खसेर मर्स्याङ्दीमा आधा डुबेको छ । आइतबार बिहान साढे ७ बजेतिरमात्रै एक जना जिप चालकले खबर गरेपछि दुर्घटनाबारे जानकारी पाएको सई शर्माले बताए । उक्त बस निकाल्नका लागि एक्साभेटर प्रयोग गर्ने तयारी गरिएको उनले बताए ।
जिल्ला प्रहरी कार्यालयका प्रहरी निरीक्षक बुद्धिप्रसाद सुवेदीले मर्स्याङ्दीमा मध्यराति बस खसेको र चालक बेपत्ता भएको बुझिएको बताए । उनका अनुसार घटनाको विस्तृत विवरण आउन बाँकी छ ।
