एमालेले ब्यूँतायो ०७५ जेठ २ को संरचना : स्थायी कमिटी बैठकका चार ऐतिहासिक निर्णय
प्रमुख प्रतिपक्षी दल नेकपा एमाले औपचारिकरुपमै २०७५ जेठ २ मा फर्किएको छ । कांग्रेस सभापति शेरबहादुर देउवाको गठबन्धनमा लागेपछि माधव नेपाललाई छाडेका नेताहरुसहित पहिलोपटक आज बसेको स्थायी कमिटी बैठकले पार्टीका सबै संगठनलाई २०७५ जेठ २ को अवस्थामा फर्काउने निर्णय गरेको हो ।
यो निर्णयसँगै एमालेले १० बुँदे सहमति कार्यान्वयनमा ल्याएको छ । एमाले प्रवक्ता प्रदीप ज्ञवालीले दिनुभएको जानकारीअनुसार बैठकले पार्टीको पक्षमा क्रियाशील रहने केन्द्रीय कमिटी, केन्द्रीय निकाय, प्रदेश, जिल्ला र सबै तहका कमिटीलाई २०७८ जेठ २ पूर्वको अवस्थामा क्रियाशील हुन निर्देशन दिएको छ ।
एमालेले पार्टीको आन्तरिक एकताका लागि तयार भएको १० बुँदे सहमतिलाई सन्दर्भ सामग्रीको रुपमा लैजाने निर्णयसमेत गरेको छ । ज्ञवालीका अनुसार ०७५ जेठ २ को अवस्थामा लैजाँदा आउने समस्या समाधान गर्न उपाध्यक्ष भीम रावल, महासचिव ईश्वर पोखरेल, उपमहासचिव घनश्याम भूसाल र स्थायी कमिटी सदस्यद्वय सुरेन्द्र पाण्डे र लेखराज भट्टलगायतका नेताहरु रहेको कमिटी गठन गरेको छ ।
एमालेले जेठ २ लाई आधार मानेर पार्टी सदस्यता नवीकरण गर्ने, विधान महाधिवेशन आगामी असोज ४, ५ र ६ गते काठमाडौंमा गर्ने तथा काठमाडौंमै आगामी मंसिर १०, ११ र १२ गते दशौं महाधिवेशन गर्ने निर्णय गरेको छ । विधान महाधिवेशनका लागि दस्तावेज तयार गर्न भदौ २५ र २६ गते स्थायी कमिटी बैठक तय गरिएको छ ।
एमालेले आगामी कात्तिक ६ गते वडा र कात्तिक ९ गते पालिका, नगर अधिवेशन गर्ने निर्णय गरेको छ । साथै, भदौ १६ देखि जिल्ला कार्यकर्ता भेला र जनसंगठनका भेला गर्ने तथा भदौ १० गते केन्द्रीय कमिटीको बोलाउने निर्णय पनि स्थायी कमिटी बैठकले गरेको छ ।
