अन्तर पालिकास्तरीय दोश्रो ऋषिङ कपको उपाधि बागलुङको गल्कोटले उचाल्यो, शुक्लागण्डकी उपविजेता
भञ्ज्याङ न्यूज
तनहुँको ऋषिङ गाउँपालिकाले आयोजना गरेको खुला अन्तर पालिकास्तरीय अध्यक्ष कप भलिबलको उपाधि बाग्लुङको गल्कोट नगरपालिकाले उचालेको छ । ऋषिङको झापुटार खेल मैदानमा भएको फाइनल खेलमा तनहुँको शुक्लागण्डकी नगरपालिकालाई ३-२ सेटमा पराजित गर्दै गल्कोटले दोश्रो ऋषिङ अध्यक्ष कपको उपाधि उचालेको हो । शुक्लागण्डकी गत बर्षभएको पहिलो संस्करणको उपाधि विजेता हो ।
प्रतियोगिताको फाइनल खेलको पहिलो सेटमा गल्कोट शुक्लागण्डकी माथी हावि भएको थियो । गल्कोटले शुक्लागण्डकीलाई पहिलो सेटमा २५-२१ को स्कोरमा पराजित गर्दै विजयी यात्रा सुरु गरेको थियो । दोस्रो सेटमा खेल सुर्धादै शुक्लागण्डकीले गल्कोटलाई २५-२२ को स्कोरमा पराजित गरेको थियो ।
यस्तै, तेस्रो सेटमा गल्कोटले शुक्लागण्डकीलाई २५-२१ को स्कोरमा पराजित गर्दा चौथो सेटमा शुक्लागण्डकीले निकै उत्कृष्ट पर््रदशन गर्दै २५-१५ को स्कोरमा जित दर्ता गर्यो । पाँचौ सेटमा गल्कोटले शुक्लागण्डकीलाई १५-१२ को स्कोरमा पराजित गर्दै ऋषिङ अध्यक्ष कपको उपाधि प्राप्त गर्न सफल भएको थियो ।
गत चैतमा शुक्लागण्डकी नगरपालिकाले आयोजना गरेको मेयर कपको फाइनलमा गल्कोटसँग घरेलु मैदानमा भोगेको पराजयको बदला लिने अवसरबाट शुक्लागण्डकी चुकेको छ । उपाधिसँगै गल्कोटले नगद एक लाख ४० हजार रुपैयाँको साथमा शिल्ड, मेडल र प्रमाणपत्र प्राप्त गरेको छ भने उपविजेता शुक्लागण्डकीले एक लाख रुपैयाँमा चित्त बुझाएको छ ।
यस्तै, मंगलबार भएको पहिलो सेमिफाइनल खेलमा शुक्लागण्डकीले तनहुँकै भिमाद नगरपालिकालाई पराजित गर्दै फाइनल यात्रा तय गरेको थियो । गल्कोटले स्याङजाको विरुवा गाउँपालिकालाई बुधबार विहान भएको दोस्रो सेमिफाइनलमा पराजित गर्दै शुक्लागण्डकीसँगको फाइनल प्रतिस्पर्धा गरेको थियो ।
सेमिफाइनलमा पराजित विरुवाले भिमादलाई हराउदै तेस्रो स्थान प्राप्त गरेको छ । विरुवाले भिमादलाई ३-२ को सेटमा पराजित गरेको हो । विरुवाले भिमादलाई २५-१७, २१-२५, ३०-२८, १३-२५ र १५-८ को स्कोरमा पराजित गर्दै ६० हजार र भिमादले ३० हजार रुपैयाँको साथमा शिल्ड मेडल र प्रमाणपत्र प्राप्त गरेका छन् ।
त्यस्तै, विधागततर्फगल्कोटका प्रकाश सुनार बेस्ट प्लेयर घोषित भए । शुक्लागण्डकीका प्रदिप गुरुङ बेस्ट स्पाइकर, विरुवाका सन्दिप खड्का बेस्ट डिफेन्डर, शुक्लागण्डकीका प्रेम कुमाल बेस्ट ब्लकर, गल्कोटका मिन नेपाली बेस्ट लिफ्टर र राजु विक बेस्ट र्सभर घोषित हुँदै पुरस्कृत भएका छन् ।
खेलकुदका माध्यमबाट पर्यटन प्रवर्द्धन गर्ने उद्देश्यले आयोजित भलिबल प्रतियोगिताको विजेता समुह र खेलाडीलाई ऋषिङ गाउँपालिका अध्यक्ष राजेन्द्रकृष्ण श्रेष्ठ, उपाध्यक्ष गिनुमाया थापाले पुरस्कृत गरेका छन् । गत शनिबार सुरु भएको दोस्रो संस्करणको ऋषिङ अध्यक्ष कपमा गण्डकी प्रदेशका १६ पालिकाका खेलाडीको सहभागिता रहेको थियो ।
