करिब ४३ वर्षपछि तनहुँको छिम्केश्वरी डाँडामा हिमपात (तस्विर सहित)
भञ्ज्याङ न्यूज
तनहुँको छिम्केश्वरी डाँडामा करिब ४३ वर्षपछि हिमपात भएको छ । बिहीबार साँझबाट परेको झरिसंगै शुक्रबार बिहानदेखी छिम्केश्वरी डाँडामा हिमपात भएको हो ।
आँवुखैरेनी गाउँपालिकाको वडा नं. ५ अवस्थित छिम्केश्वरी तनहुँ जिल्लाको अग्लो पहाड हो । समुन्द्री सतहबाट २ हजार १३४ मिटर उचाइमा फैलिएको यो पहाड प्राकृतिक, धार्मिक र ऐतिहासिक हिसावले महत्वपूर्ण र रमणीय छ ।
गोरखाको मनकामना देवीकी दिदीको रुपमा पुजिने छिम्केश्वरी माईको मन्दिर रहेको यस ठाउँ प्राकृतिक हिसावले पनि निकै रमणीय र महत्वपूर्ण रहेको छ । हिउँपरेसंगै अहिले यस क्षेत्रमा अत्याधिक चिसो बढ्नुका साथै हिउँखेल्नका लागि आन्तरिक पर्यटकहरु आउने गरेको वडा अध्यक्ष पञ्चबहादुर गुरुङले बताए ।
वडाध्यक्ष गुरुङका अनुसार छिम्केश्वरी डाँडामा करिब ४३ वर्षपछि हिमपात भएको र हिमपात भएको क्षेत्रमा मानवबस्ति नभएकोले जनजीवन सामान्य रहेको छ । लामो समयपछि हिउँपर्दा छिम्केश्वरी डाँडाको दृष्य नै निकै मनमोहक देखिएको छ । अहिले हिउँखेल्नका लागि आन्तरिक पर्यटकहरु डाँडामा उक्लन थालेका छन् ।
छिम्केश्वरी मन्दिर भन्दा करिब तीन सय मिटर तलसम्म हिउँ परेको बताइएको छ ।
तस्विर सौजन्य : सूर्यमान सिंह गुरुङ/भञ्ज्याङ
