बलात्कार आरोपित अभिनेता शाहलाई बयानका लागि तनहुँबाट गैंडाकोट लगियो
एक नाबालिकलाई बलात्कार गरेको आरोपमा जिल्ला प्रहरीक ार्यालय तनहुँको हिरासतमा रहेका अभिनेता पल शाहलाई बयानका लागि नवलपरासीको गैंडाकोट लगिएको छ ।
नाबालिक बलात्कार गरेको अभियोगमा अनुसन्धान गर्न अभिनेता शाहलाई इलाका प्रहरी कार्यालय गैंडाकोटमा लगिएको हो । नाबालिकले आफूलाई बलात्कार गरेको अभियोगमा मुद्दा दर्ता गराएको दुइ सातापछि तनहुँ प्रहरी हिरासतमा रहेका शाहलाई मंगलबार प्रहरी कार्यालय गैंडाकोटमा लगिएको प्रहरीले जनाएको छ ।
बुधबार जिल्ला अदालतबाट म्याद थपेर अनुसन्धान अघि बढाइने गिरीले जानकारी दिए । फागुन १६ गते गैंडाकोट प्रहरीमा मुद्दा दर्ता गराएकी ती किशोरीको त्यही दिन भरतपुर अस्पतालमा स्वास्थ्य परीक्षण गराइएको थियो ।
बलात्कारको मुद्दामा अनुसन्धान गर्न शाहलाई इलाका प्रहरी कार्यालय गैंडाकोटमा राखेर अनुसन्धान सुरु गरिने बताइएको छ । तनहुँमा पनि उनै किशोरीले शाहले बलात्कार गरेको भन्दै दुइ साताअघि मुद्दा दर्ता भएको र जिल्ला अदालत तनहुँबाट तनहुँ प्रहरीले थप १२ दिनको म्याद थप गरी अनुसन्धान कार्य अगाडि बढाइरहेको बताइएको छ ।
जिल्ला प्रहरी कार्यालय पूर्वी नवलपरासीले तनहुँ प्रहरीलाई गत आइतबार पत्र पठाउँदै पल शाहविरुद्ध बलात्कारको उजुरी गैंडाकोट प्रहरीमा परेकाले यहाँ पनि उनका बारेमा अनुसन्धान गर्न परेकाले पठाइदिनु भन्दै पत्राचार गरेको थियो ।
प्रहरीका अनुसार ती नाबालिगले एउटा गीतको छायांकनको क्रममा गत चैत ७ गते गैंडाकोटको एक होटलमा आफूलाई बलात्कार गरेको भन्दै इलाका प्रहरी कार्यालय गैंडाकोटमा दुइ साताअघि किटानी जाहेरी दिएकी थिइन् ।
गत चैत ७ गते बलात्कार गरेको आरोपपत्रमा उल्लेख भएका कारण आगामी चैतको ६ गतेभित्र अदालतमा मुद्दा दर्ता गरिसक्नु पर्ने जिल्ला प्रहरी कार्यालयलाई बाध्यता छ । गैंडाकोटमा दुइ साताअघि दर्ता गराएको निवेदन अनुसार एकै दिनमा सकिने छायांकनको काम दुइ दिन लगाएर गैंडाकोटको होटलमा रक्सी खुवाएर आफूलाई बलात्कार गरेको आरोप नाबालिगले लगाएकी छन् ।
त्यतिबेला इलाका प्रहरी कार्यालय गैंडाकोटमा मुद्दा दर्ता गराउन पीडित किशोरी, उनका बाबु र वकिल आएका थिए । शाहविरुद्ध तनहुँ र नवलपरासी प्रहरीमा बलात्कारको अभियोग लगाएर मुद्दा दर्ता गराउने नाबालिग एउटै भएको प्रहरीले बताएको छ ।
