स्थानीय निर्वाचन : नेकपा एमाले तनहुँ उम्मेदवार टुंग्याउँने कसरतमा

आसन्न स्थानीय तहको निर्वाचनको मिति नजिकिएसंगै दलहरु उम्मेदवार चयनको कसरतमा जुटेका छन् । तनहुँका राजनीतिक दलहरु यतिबेला आकांक्षीहरुको नामावली संकलन गरी आकांक्षीहरुबाटै उपयुक्त उम्मेदवार चयन गर्ने कसरतमा लागि परेका छन् । एउटै पदमा दर्जन बढीको संख्यामा आकांक्षीहरु देखिएपछि उम्मेदवार कसरी टुंग्याउने भन्ने समस्यामा दलका नेताहरु जेलिएका छन् ।

नेकपा (एमाले) तनहुँ पनि अहिले वडा, गाउँ/नगर कमिटीका उम्मेदवार चयनका लागि दौडाधुप गरिरहेको छ । गाउँ/नगर कमिटीबाटै दुइ/दुइ जना आकांक्षी उम्मेदवारहरु चयन गरी जिल्ला कमिटीमा सिफारिस गर्ने भनिएपनि एकै पदमा धेरै आकांक्षीहरु खडा भएपछि आकांक्षीहरुको नामावली गाउँ/नगर कमिटीले जिल्ला कमिटीमा सिफारिस गर्न थालेका छन् ।

एमाले तनहुँले सोमबारसम्म भिमाद नगरपालिका, घिरिङ गाउँपालिकाको उम्मेदवारी टुंग्याएको छ । नेकपा एमाले भिमाद नगरपालिकाको प्रमुखको उम्मेदवार छनौटका लागि सोमबार मतदान प्रक्रियाबाट दुइ जनाको नाम छनोट गरेको छ । प्रमुख पदमा आठ जना आकांक्षी भएपछि भिमाद नगर कमिटीले मतदानमार्फत दुइ जनाको नाम जिल्ला कमिटीमा सिफारिस गरेको हो ।

मतदान मार्फत दधिराज सुवेदी र भिमाद नगर कमिटीका अध्यक्ष इमानबहादुर थापा नगरप्रमुख पदको उम्मेदवारका लागि सिफारिस भएका छन् । सुवेदीले ५८ र थापाले ५७ मत प्राप्त गरेका थिए । वर्तमान मेयर मेखबहादुर थापाले ३६ मत प्राप्त गरेसंगै उनी मेयर उम्मेदवारबाट रिङ आउट भएका छन् ।

यसैगरी उपप्रमुखमा शारदा खनाल, नारायणी गैह्रे र चन्द्रावती श्रेष्ठ सिफारिस भएका छन् । एमालेको विधान बमोजिम मेयर उपमेयरमा दुइ पुरुष र एक महिला उम्मेदवार सिफारिस गर्नुपर्ने प्रावधान थियो । सबै उम्मेदवारबीच छलफल भएपनि सहमति नभएपछि मतदानमार्फत उम्मेदवार सिफारिस गरिएको जिल्ला कमिटी अध्यक्ष श्रीप्रसाद श्रेष्ठले बताए ।

नेकपा एमाले घिरिङ गाउँ कमिटीले पनि सोमबार मतदानमार्फत अध्यक्ष र उपाध्यक्षका उम्मेदवार सिफारिस गरेको छ । अध्यक्षमा दश जना आकांक्षी भएपछि गाउँ कमिटीले सोमबार मतदानमार्फत उम्मेदवार टुङ्गो लगाएको हो । अध्यक्षका लागि वर्तमान अध्यक्ष रनबहादुर राना र होमबहादुर थापा सिफारिस भएका छन् ।

उपाध्यक्षका लागि दुर्गामाया थापा, सुकमाया गुरुङ र राधा अधिकारी सिफारिस भएकी छन् भने वर्तमान उपाध्यक्ष सरस्वती सिग्देल सिफारिस हुन सकिनन् । यता बन्दिपुर गाउँपालिकाको अध्यक्षमा भने सर्वसम्मत रुपमा सुरेन्द्र थापाको नाम सिफारिस भएको छ भने उपाध्यक्षको उम्मेदवारको टुंगो नलागेको अध्यक्ष श्रेष्ठले बताए । उनका अनुसार अन्य पालिकाहरुमा आकांक्षीहरु धेरै भएका र र्सवसम्मत रुपमै उम्मेदवारको नाम सिफारिस गर्ने कसरत भइरहेको र र्सवसम्मत नभए मतदान प्रक्रियाबाट उम्मेदवारको नाम सिफारिस गरिने भएको छ ।

यस्तै, जिल्लाको सदरमुकाममा रहेको व्यास नगरपालिकाको प्रमुख पदमा १२ जनाले र उपप्रमुखमा तीन जनाले आकांक्ष व्यक्त गरेका छन् । नेकपा एमाले व्यास नगर कमिटीको सोमबार आयोजित बैठकमा नगरप्रमुख बन्न १२ जनाले आकांक्षा व्यक्त गरेका हुन् ।

नगरप्रमुखका लागि राजेन्द्र कार्की, रत्न कुमार श्रेष्ठ, इश्वर बहादुर विष्ट, कुल बहादुर थापा, दिपेन्द्रराज शाही, अनिल पाण्डे, देवी बहादुर बस्नेत, दीर्घ बहादुर दरै, प्रदिप अधिकारी, तुल्सीराम पाण्डे, सीता पाण्डे र ऋषिराम भुषालले आकांक्षा व्यक्त गरेका छन् । यस्तै, उपप्रमुख पदका लागि बसुन्धरा घर्ती, वेदकुमारी वाग्ले र वीरेन्द्र अधिकारीले दावी गरेको व्यास नगर कमिटीले जनाएको छ ।

शुक्लागण्डकी नगरपालिकाको प्रमुखमा नेकपा एमालेबाट पाँच जना आकांक्षी देखिएका छन् । नगर कमिटीको आइतबार बसेको बैठकमा पाँच जनाले प्रमुखमा र चार जनाले उपप्रमुखमा नाम दर्ता गराएका छन् । नगरप्रमुख पदका लागि केन्द्रीय सदस्य एवं हालकी उपमेयर सविता रर्साईली, नगर कमिटीका अध्यक्ष मुक्ति तिमिल्सेना, गण्डकी प्रदेश कमिटीका सदस्यद्वय रामचन्द्र उपाध्याय र श्यामराजा महत र जिल्ला कमिटीका सचिवालय सदस्य देवलाल खनालले आकांक्षा व्यक्त गरेका छन् ।

यस्तै नगर उपप्रमुख पदका लागि कमल ढकाल, हर्क गुरुङ, विष्णुमाया पराजुली र फूलमाया वाग्लेले आकांक्षा व्यक्त गरेको नगर कमिटीले जनाएको छ । दुवै पदमा एक/एक जनामा सहमति नभएपछि दर्ता भएका सबै आकांक्षीको नाम जस्ताको तस्तै जिल्ला कमिटीमा पठाइने र जिल्ला कमिटीले राय सहित प्रदेशमा पठाउने बताइएको छ ।

२०७४ सालको निर्वाचनमा कांग्रेस र माओवादीबीच गठबन्धन भएर मेयरमा कांग्रेसका किसान गुरुङ निर्वाचित भएका थिए। उपमेयरमा भने माओवादीकी सर्वदा खनाल पराजित भएर एमालेकी सविता रसाइली निर्वाचित भएकी थिइन् । १२ मध्ये सात वडा एमाले, तीन वडा कांग्रेस र दुइ वडा माओवादीले जितेको छ ।

त्यस्तै, भानु नगरपालिकाको प्रमुख पदमा ७ जना आकांक्षी देखिएका छन् । उम्मेदवार चयन गर्ने सम्बन्धमा गत बुधबार आयोजित नगर कमिटीको बैठकमा ७ जनाले नगरप्रमुख र ४ जनाले नगरउपप्रमुखमा आकांक्षा देखाएका हुन् । बैठकले उम्मेदवार सिफारिस सम्बन्धी कुनै निर्णय गर्न नसकेपछि प्रस्तावित सबै नामलाई जिल्ला कमिटी मार्फत प्रदेश कमिटीमा पठाउने निर्णय गरेको छ ।

भानुको प्रमुखको आकांक्षीहरुमा सुनिल पाण्डे, सीताराम बजगाई, हरिबहादुर पाण्डे, कलाकुमारी ढकाल, शंकर रानाभाट, कृष्णराज ढकाल र श्याम थापा रहेका छन् । यस्तै उपप्रमुखमा रुपा लामा, देवु विष्ट, भगवती देउजा र गिता अधिकारीले आकांक्षा व्यक्त गर्दै नाम दर्ता गराएका थिए । ती नामहरु जस्ताको तस्तै जिल्ला कमिटीमा पठाइएको छ ।

यस्तै, ऋषिङ गाउँपालिकाको अध्यक्षका लागि नेकपा एमालेका चार जनाले दावी गरेका छन् । गाउँ कमिटीको सोमबार बसेको बैठकमा एमालेका चार जनाले अध्यक्षका लागि आकांक्षा व्यक्त गरेका छन् । गाउँपालिका अध्यक्षका लागि एमाले जिल्ला उपाध्यक्ष हरिराज कंडेल, सचिव राजेश्वर ढकाल, ऋषिङ गाउँ कमिटीका अध्यक्ष गन्जसिं गुरुङ र सचिव कविराज श्रेष्ठले इच्छा व्यक्त गरेका छन् ।

यस्तै उपाध्यक्षका लागि हुमादेवी रानाभाट, मधुमाया थापा, तारादेवी थापा र सुशीला गिरीले आकांक्षा व्यक्त गरेको गाउँ कमिटीले जनाएको छ । बैठकले आशिष गिरीको संयोजकत्वमा युवा स्वयंसेवक परिचालन कमिटी, पदम खाँडको संयोजकत्वमा बुथ संरक्षण समिति गठन गरेको छ ।

एमाले तनहुँले जिल्लाका अन्य पालिकाको आकांक्षीहरुको नामावली संकलन गरी सर्वसम्मत, सर्वसम्मत नभए मतदान प्रक्रियाबाट उम्मेदवार चयन गरी सफारिस गर्ने तयारीमा जुटेको छ । एमालेको विधान बमोजिम नगर प्रमुख, उपप्रमुख र अध्यक्ष, उपाध्यक्षमा दुइ पुरुष र एक महिला उम्मेदवार सिफारिस गर्नुपर्ने प्रावधान छ ।

सेयर गर्नुहोस्

प्रतिक्रिया दिनुहोस्

सम्बन्धित खवर