तनहुँको व्यास बाहेक सबै पालिकामा मतगणना सुरु, ६४.४० प्रतिशत मत खस्यो (कुन पालिकामा कति मत खस्यो ? सूचिसहित)
भञ्ज्याङ न्यूज
स्थानीय तह निर्वाचन २०७९ अन्तर्गत शुक्रबार भएको मतदान सकिएपछि तनहुँमा मतगणना सुरु भएको छ । जिल्लाको व्यास नगरपालिका बहेक अन्य नौ पालिकामा मतगणना कार्य अगाडि बढाइएको छ ।
बन्दिपुर, म्याग्दे र घिरिङ गाउँपालिकामा शुक्रबार रातीदेखि नै मतगणना सुरु भएको छ भने भिमाद नगरपालिकामा आज बिहानदेखि मतगणना सुरु गरिएको हो । यस्तै, देवघाट गाउँपालिकामा आज ११:३० बजेबाट मतगणना शुरु भएको छ भने शुक्लागण्डकी नगरपालिकामा १०:०० बजेबाट, आँवुखैरेनीमा बिहाना १०:३० बजेबाट र ऋषिङ गाउँपालिका र भानु नगरपालिकामा दिउँसो १:०० बाट मतगणना कार्य अगाडि बढाइएको छ ।
यता, व्यास नगरपालिकामा भने मतगणनामा अन्यौल भएको छ । व्यास-८ रिस्ती मतदान केन्द्रमा विवाद भएपछि नेकपा (एमाले) र गोविन्दराज जोशी समूहले पुनःमतदान गर्न माग गर्दै मुख्य निर्वाचन अधिकृतको कार्यालयमा उजुरी दिएका छन्।
स्थानीय तह निर्वाचन अन्तर्गत तनहुँमा ६४.४० प्रतिशत मत खसेको प्रारम्भिक तथ्याङ्क निकालिएको छ । जिल्लाका दशवटै पालिकाका २९७ मतदान केन्द्रमा भएको मतदानमा १ लाख ५७ हजार ३५१ मत खसेको प्रारम्भिक तथ्याङ्क संकलन भएको जिल्ला निर्वाचन कार्यालय तनहुँले जनाएको छ ।
जिल्ला निर्वाचन कार्यालय तनहुँका अनुसार आँवुखैरेनी गाउँपालिकामा कायम गरिएको १७ मतदान केन्द्रमा १३ हजार ६३१ मतदाता मध्ये ९ हजार २७८ जनाले मतदान गरेका छन् ।
ऋषिङ गाउँपालिकाको २५ मतदान केन्द्रमा १८ हजार २३८ मतदाता मध्ये १० हजार ६७७ मत खसेको छ । घिरिङ गाउँपालिकाको १७ मतदान केन्द्रमा १४ हजार ६७६ मतदाता मध्ये ८ हजार ७१८ मत खसेको छ ।
देवघाट गाउँपालिकाको १५ मतदान केन्द्रमा १२ हजार ८१५ मतदाता मध्ये ८ हजार ६४७ मत खसेको छ । बन्दिपुर गाउँपालिकाको २१ मतदान केन्द्रमा १५ हजार ६३८ मतदाता मध्ये १० हजार २०५ मत खसेको छ । म्याग्दे गाउँपालिकाको २० मतदान केन्द्रमा १८ हजार १०५ मतदाता मध्ये ११ हजार ९४३ मतदाताले मतदान गरेका छन् ।
यस्तै, भानु नगरपालिकाको ४९ मतदान केन्द्रमा ४० हजार ४९६ मतदाता मध्ये २५ हजार ५६३ मत खसेको छ । भिमाद नगरपालिकाको ३१ मतदान केन्द्रमा २४ हजार ८८४ मतदाता मध्ये १६ हजार १४९ जनाले मतदान गरेका छन् ।
व्यास नगरपालिकाको ५६ मतदान केन्द्रमा ४७ हजार ५४२ मतदाता मध्ये ३० हजार १७४ मत खसेको छ । शुक्लागण्डकी नगरपालिकाको ४६ मतदान केन्द्रमा ३८ हजार ३१५ मतदाता मध्ये २५ हजार ९९७ मतदाताले मतदान गरेका छन् ।
जिल्लाको २९७ मतदान केन्द्रमा १ लाख १७ हजार १३४ पुरुष, १ लाख २७ हजार २०६ गरी २ लाख ४४ हजार ३४० मतदाता रहेकोमा ७१ हजार २२० पुरुष र ८५ हजार ८९२ जना महिला गरी १ लाख ५७ हजार ३५१ जना मतदाताले मतदान गरेको जिल्ला निर्वाचन कार्यालय तनहुँले प्ररम्भिक तथ्याङ्क सार्वजनिक गरेको छ ।
चार नगरपालिकाबाट प्रमुख र उपप्रमुख गरी आठ जना निर्वाचित हुनेछन् । छ गाउँपालिकाबाट अध्यक्ष र उपाध्यक्ष गरी १२ जना निर्वाचित हुनेछन् । त्यस्तै ८५ वडाबाट एक अध्यक्ष र चार सदस्य गरी ४२५ निर्वाचित हुनेछन् ।
कुन पालिकामा कति मत खस्यो ?
