तनहुँमा प्रत्यक्ष तर्फको मत गणना सकियो, दुइ प्रतिनिधिसभा र दुइ प्रदेशमा कांग्रेस, एक/एकमा एमाले र माओवादी विजयी
भञ्ज्याङ समाचारदाता/तनहुँ
गत मंसिर ४ गते सम्पन्न प्रतिनिधिसभा र प्रदेशसभा सदस्य निर्वाचन २०७९ अन्तर्गत तनहुँमा प्रत्यक्ष तर्फको मत गणना सकिएको छ भने समानुपातिक तर्फको मतगणना जारी रहेको छ । दुइ प्रतिनिधिसभा र चार प्रदेशसभा सदस्यका लागि भएको निर्वाचनमा बाम-लोकतान्त्रिक गठबन्धनका उम्मेदवारहरुले गठबन्धनको बलमा सहज जित निकालेका छन् ।
प्रत्यक्ष तर्फको मतगणनाको सार्वजनिक परिणाम अनुसार तनहुँका दुइ प्रतिनिधिसभा सदस्य सहित दुइ प्रदेशसभा सदस्यमा विजय हासिल गरेको छ । गठबन्धनको उम्मेदवारलाई हराउँदै नेकपा (एमाले)ले एक प्रदेससभा सदस्यमा जित निकालेको छ भने गठबन्धनबाट नेकपा (माओवादी) केन्द्रले पनि एक प्रदेशसभामा विजय हासिल गरेको छ ।
नेपाली कांग्रेसले तनहुँ-१ र २ को प्रतिनिधिसभाका साथै तनहुँ १ को प्रदेशसभा १ र तनहुँ २ को प्रदेशसभा २ मा विजय हासिल गरेको छ । नेकपा (एमाले)ले तनहुँ २ को प्रदेशसभा १ र गठबन्धनबाट नेकपा (माओवादी) केन्द्रले तनहुँ १ को प्रदेशसभा २ मा विजय हासिल गरेको छ ।
निर्वाचित पश्चात बाम-लोकतान्त्रिक गठबन्धनले दमौली आयोजना गरेको शुभकामना आदनप्रदान तथा धन्यवाद कार्यक्रममा तनहुँ १ बाट प्रतिनिधिसभा सदस्यमा निर्वाचित कांग्रेसका वरिष्ठ नेता रामचन्द्र पौडेलले आफुले पाएको मत लोकतन्त्र र देशमा आएको परिवर्तनलाई जोगाउने पक्षमा आएको बताएका छन् ।
सातौ पटक चुनावी मैदानमा उत्रिएर छैटौं पटक संसदको यात्रा तय गरेका पौडेलले नेपाली जनताले लोकतन्त्रको भविष्य सुनिश्चित गरेका र अब हामीले यत्तिकै सन्तोष नमानि जनतालाई विश्वासमा लिएर सुशासन र विकास दिनुपर्ने बेला आएको बताए । उनले मुलुकमा सुशासन दिनलाई हामीमा नैतिक सामर्थ्य आवश्यक रहेको चर्चा गर्दै यो देशमा नैतिक शक्ति भएको नेतृत्वको खाँचो रहेको बताएका छन्।
तनहुँ-१ मा प्रतिनिधिसभामा कांग्रस नेता पौडेलले २५ हजार ३१८ मतसहित विजयी भएको सहायक निर्वाचन अधिकृत मीनबहादुर कुंवरले जानकारी गराएका छन् । उनका प्रतिस्पर्धी नेकपा (एमाले) का एकबहादुर रानाले १९ हजार ९४३ मत प्राप्त गरेका छन् ।
यस्तै, तनहुँ क्षेत्र नम्बर २ को प्रतिनिधिसभा सदस्यमा निर्वाचित नेपाली कांग्रेसका नेता शंकर भण्डारीले ३० हजार ६०४ मत प्राप्त गरेका छन् । उनका प्रतिस्पर्धी नेकपा (एमाले) का किरण गुरुङले २५ हजार १३० मत प्राप्त गरेका छन् ।
मतदातालाई धन्यवाद दिंदै नवनिर्वाचित भण्डारीले गठबन्धन फगत चुनाव जित्ने र सरकार बनाउने मात्रमा सिमित हुन नहुने बताएका छन् । उनले गठबन्धन पाँच वर्षम्म टिकाएर र टिकेर दलीय स्वार्थ भन्दा माथि उठी देशको वर्तमान अवस्था, राजनीतिक परिस्थितिलाई सुधार गर्दै विकासको नेतृत्व गर्ने खालको हुनुपर्ने बताएका छन् ।
निर्वाचनमा तनहुँ १ को प्रदेशसभा १ मा नेपाली कांग्रेसका अशोककुमार श्रेष्ठ विजयी भएका छन् । श्रेष्ठले १५ हजार ३६७ मत प्राप्त गरेका छन् भने उनका प्रतिस्पर्धी नेकपा (एमाले)का उम्मेदवार रामबहादुर गुरुङले ११ हजार १५५ मत प्राप्त गरेका छन् ।
तनहुँ १ को प्रदेशसभा २ मा नेकपा (माओवादी) केन्द्रका हरिबहादुर चुमान विजयी भएका छन् । चुमानले १३ हजार २७१ मत प्राप्त गरेका छन् भने उनका प्रतिस्पर्धी नेकपा (एमाले)का पूर्णबहादुर गुरुङले १० हजार ५०३ मत प्राप्त गरेका छन् ।
यस्तै, तनहुँ २ प्रदेशसभा १ मा नेकपा -एमाले) का श्यामराजा महत निर्वाचित भएका छन् । १५ हजार ६६५ मत प्राप्त गरेका महतका प्रतिस्पर्धी बाम लोकतान्त्रिक गठबन्धनबाट नेकपा (माओवादी) केन्द्रका उम्मेदवार राजेन्द्रकेशरी न्यौपानेले १३ हजार ८९९ प्राप्त गरे छन्।
तनहुँ २ को प्रदेशसभा २ मा नेपाली कांग्रेसका उम्मेदवार जीतप्रकाश आले विजयी भएका छन् । आलेले १३ हजार ८६० मत प्राप्त गरेका छन् भने उनका प्रतिस्पर्धी नेकपा (एमाले) का केदार सिग्देलले १३ हजार २२० मत प्राप्त गरेका थिए ।
नवनिर्वाचित प्रदेशसभा सदस्यहरुले मतदातालाई धन्यवाद व्यक्त गर्दै चुनावका समयमा मतदाताको घरदैलोमा पुगेर गरेको वाचाहरु योजनावद्ध रुपमा पुरा गर्न लागि पर्ने प्रतिवद्धता जनाएका छन् ।
यस्तै, तनहुँमा प्रत्यक्ष त्फको मत गणना सकिएपनि मुख्य निर्वाचन र निर्वाचन अधिकृतको कार्यालयले भने आधिकारिक घोषणा गरेको छैन । समानुपातीक तर्फको मत गणना कार्य चलिरहेको हुँदा सामानुपातिक तर्फको मत परिणाम आएसंगै आधिकारीक रुपमा विजेता घोषणा गरिने निर्वाचन अधिकृत गोविन्द उपाध्यायले बताएका छन् ।
