भानुमा निशुल्क आयूर्वेद स्वास्थ्य शिविर सम्पन्न

तनहुँको भानु नगरपालिकाको वडा नम्बर १० स्थित चोक माध्यमिक विद्यालयमा शनिवार निःशुल्क विशेषज्ञ आयूर्वेद स्वास्थ्य शिविर एवं औषधी वितरण कार्यक्रम सम्पन्न गरिएको छ । राष्ट्रिय आयुर्वेद अनुसन्धान तथा तालिम केन्द्रको कीर्तिपुर काठमाडौंको आयोजना एवं भानु नगरपालिकाको सहकार्यमा उक्त कार्यक्रमको आयोजना गरिएको हो ।

कार्यक्रमको उद्घाटन गर्दै नेपाली कांग्रेसका वरिष्ठ नेता रामचन्द्र पौडेलले मानिसले स्वास्थ्यलाई विशेष ध्यान दिनुपर्ने बताए । नागरिकलाई खानपानको विषयमा जानकारी नहुँदा समस्या हुने बताउदै पौडेलले खानपानमा विशेष ध्यान दिनुपर्ने समेत बताएका थिए । तनहुँ क्षेत्र नम्बर-१ का जनताको समस्याबारे आफु सचेत रहेको बताउदै उनले स्वास्थ्य, शिक्षा, रोजगारी लागयतका कामलाई निरन्तरता दिने बताएका थिए ।

कार्यक्रममा भानु नगरपालिकाका नगरप्रमुख आनन्दराज त्रिपाठीले नगरबासीको घरदैलोमै स्वास्थ्य सेवा पुर्‍याउने उदेश्यले कार्यक्रम आयोजना गरिएको बताएका थिए । कार्यक्रममा चिकित्सकहरुले स्वास्थ्य परिक्षण एवं निशुल्क औषधी वितरण समेत गरेका थिए । उक्त शिविरमा ४३० जनाले सेवा लिएका थिए ।

सेयर गर्नुहोस्

प्रतिक्रिया दिनुहोस्

सम्बन्धित खवर