‘व्यास नगर कोभिड-१९ पिसिआर प्रयोगशाला’ले पायो अनुमति (पत्रसहित)
भञ्ज्याङ न्यूज
तनहुँको व्यास नगरपालिकाले सञ्चालनमा ल्याउने तयारी गरेको ‘व्यास नगर कोभिड-१९ पिसिआर प्रयोगशाला’ले सञ्चालन अनुमति पाएको छ । प्रदेश जनस्वास्थ्य प्रयोगशाला गण्डकी प्रदेशले आज प्रयोगशाला सञ्चालनका लागि अनुमितपत्र दिएको हो ।
प्रदेश जनस्वास्थ्य प्रयोगशाला गण्डकी प्रदेशद्वारा भदौ ३० गते गरेको स्थलगत अनुगमन पश्चात पेश गरिएको प्रतिवेदन र सोही मितिमा प्रयोगशालाबाट २० नमुनाको नतिजा प्रमाणीकरणको आधारमा कोभिड-१९ पिसिआर प्रयोगशालाको मापदण्ड पुगेको देखिएकाले व्यासको प्रयोगशालालाई कोभिड-१९ पिसिआर परीक्षण गर्न अनुमति प्रदान गरिएको प्रदेश जनस्वास्थ्य प्रयोगशालाका निमित्त निर्देशक सपना सुवेदीले हस्ताक्षर गरी अनुमती पत्र दिएकी हुन् ।
यस्तै, व्यास नगरको प्रयोगशालाले पालना गर्नुपर्ने गुणस्तर नियन्त्रण सम्बन्धी शर्तहरु समेत संगै उपलब्ध गराइएको र सोही बमोजिम गर्न प्रदेश जनस्वास्थ्य प्रयोगशालाले अनुरोध गरेको छ ।
व्यास नगरको कोभिड-१९ पिसिआर प्रयोगशालाको अनुमित सम्बन्धमा स्वास्थ्य तथा जनसंख्या मन्त्रालय, गण्डकी प्रदेश र राष्ट्रिय जनस्वास्थ्य प्रयोगशाला, टेकु काठमाडौंमा बोधार्थ समेत पठाइएको छ ।
व्यास नगरपालिकाले वडा नं. १० दुम्सीमा कोभिड नगर अस्पताल सञ्चालनमा ल्याएको छ । गत भदौ १ गतेदेखि सञ्चालनमा आएको उक्त अस्पतालमै कोभिड-१९ पिसिआर प्रयोगशाला सञ्चालनमा ल्याइएको छ ।
जिल्लामा कोभिड-१९ पिसिआर प्रयोगशाला नहुँदा स्वाब संकलन गरी पठाएको रिपोर्ट आउन ढिलाई भएपछि जिल्लामै प्रयोगशाला सञ्चालन गर्न व्यास नगरपालिका लागि परेको थियो ।
उक्त प्रयोगशाला निर्माणका लागि संघ, प्रदेश सरकार तथा व्यास नगरपालिका र कर्मचारीका साथै विभिन्न सामाजिक संघ संस्था, व्यक्तिहरुले समेत आर्थिक सहयोग उपलब्ध गराएका छन् ।
