तनहुँको व्यास-१४ मा सेनेटरी प्याड बनाउने तालिम सञ्चालन

तनहुँको व्यास नगरपालिका-१४ केशवटारमा महिलाहरुलाई सेनेटरी प्याड बनाउने तालिम सञ्चालन गरिएको छ । साना किसान सामुदायिक सिकाई केन्द्रले स्थानीय महिलाहरुलाई तीन दिने सेनेटरी प्याड बनाउने तालिम सञ्चालन गरेको हो ।

सिकाई केन्द्रकी अध्यक्ष सरास्वती थापाको अध्यक्षता आयोजित तालिमको शुभारम्भ गर्दै वडा अध्यक्ष काजीमान श्रेष्ठले वातावरणीय अनुकुल सेनेटरी प्याड बनाउने तालिमले महिलाहरुलाई सहज हुने विश्वास व्यक्त गरे ।

महिलाहरुका लागि अत्यावश्यक मानिएको सेनेटरी प्याडमा धेरै रकम खर्च हुने गरेको तर यसको उपयोगमा ध्यान नदिंदा स्वास्थ्यमा जटिल समस्या भोग्नुपरेको अवस्थालाई ख्याल गर्दै तालिम सञ्चालन गरिएको केन्द्रकी अध्यक्ष थापाले बताइन् ।

स्वास्थ्य अनुकुल सेनेटरी प्याड हामी आफैले बनाउन सकिन्छ र त्यो पनि ४ वर्षम्म नियमित सफा गरी पुनः प्रयोग गर्न मिल्ने हुँदा यसले महिलाहरुको स्वास्थ्यसंगै आर्थिक पाटोलाई पनि बलियो बनाउन टेवा पुग्ने अध्यक्ष थापाले विश्वास व्यक्त गरिन् ।

‘महिलाको संवेदनशील अंगसंग जोडिएको विषयमा सबै गम्भिर बन्नुपर्छ’, अध्यक्ष थापाले भनिन्, ‘यो तालिमले केशवटारका महिलालाई सकारात्मक प्रभाव पार्ने छ । सिक्ने र सिकाउने तालिमले हाम्रो स्वास्थ्यसँगै आय आर्जनलाई पनि जोड्ने मद्दत पुग्ने छ ।’

कार्यक्रममा व्यास-१४ का वडासदस्य दुर्गा वहादुर आलेले सेनेटरी प्याडका तालिम टोल स्तरसम्म विस्तार गर्नुपर्ने बताए । यो जीवन उपयोगी सिकाई र बुझाई वडा नं. १४ को घरघरमा पुर्‍याउने र स्वास्थ्यसँग सम्वन्धित जनचेतना समेत जगाईने आलेले बताए । तालिममा स्थानीय १५ जना महिलाहरुको सहभागिता रहेको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर