कांग्रेस उम्मेदवार भट्टराइका प्रतिवद्धता : मेडिकल कलेज, पानी र बिजुलीको व्यवस्था
भञ्ज्याङ समाचारदाता/दमौली
तनहुँ-१ मा वैशाख १० हुने उपचुनावका लागि नेपाली कांग्रेसबाट उम्मेदवार बनेका गोविन्द भट्टराइले मेडिकल कलेज, निःशुल्क पानी, बिजुलीको व्यवस्था लगायतका १० बुँदे प्रतिवद्धता सहित चुनावी मैदानमा उत्रिएका छन् ।
लोकतान्त्रिक वाम गठबन्धनका साझा उम्मेदवार भट्टराइले सार्वजनिक गरेका आफ्नो चुनावी अपिलमा उक्त प्रतिवद्धता जनाएका छन् । अपिल सार्वजनिक गर्दै भट्टराइले पाँच वर्षभत्र सबै घरमा खानेपानी र बिजुली पुर्याउने घोषणा गरेका छन्।
उनले गरिब र नसक्नेका लागि न्यूनतम बिजुली र पानीको शुल्क नलिने व्यवस्था गराउने पनि उल्लेख गरेका छन् । सबै पालिकाबाट घर घरमा सेवा दिन आवश्यक व्यवस्था समेत पाँच वर्षभित्र हुने उनको प्रतिवद्धतामा छ ।
तनहुँमा एउटा सरकारी मेडिकल कलेजको स्थापनालाई प्राथमिकतामा राखेका उनले तनहुँमा प्रसुती, क्यान्सर, मृगौला वा बाल सम्बन्धी विशिष्टिकृत अस्पताल समेत स्थापना गर्ने उल्लेख गरेका छन् । जिल्लाको यातायात पूर्वाधार विकासमा विशेष जोड दिएका उनको प्रतिवद्धतामा शालिग्राम करिडोर, दमौली घुमाउने बुद्धसिं मार्ग, त्रिशुली करिडोर आदिलाई पाँच वर्षभित्र स्तरोन्नति सक्ने उल्लेख छ ।
व्यास र पुलिमराङ मार्ग, घाँसीकुवा अँधेरीभञ्ज्याङ मार्ग, छिम्केश्वरी मार्ग, केशवटार मार्ग आदिलाई पनि पाँच वर्षभत्र स्तरोन्नति सक्ने प्रतिवद्धता उनको छ । प्रतिवद्धतामा व्यासभूमिलाई त्रिवेणीधाम र भारतसँगको व्यापार नाकासँग सहजरुपमा जोड्न बुद्धसिं मार्गमै जोडेर द्रुत मार्गको परिकल्पना पनि छ ।
जिल्लाको उत्तर दक्षिण जोड्ने स्तरीय सडकलाईसमेत प्राथमिकतामा राखेका उनले पर्यटकीय थलोहरु तनहुँसुर, पुलिमराङ, थानीको थान, चोक चिसापानी, सिङचाङ गढीको विकाससँगै वेदव्यासको प्रतिमा पनि प्रतिस्थापन समयमै सकाउने भट्टराइले प्रतिवद्धता जनाएका छन् ।
तनहुँलाई सुन्तला र बाख्राको केन्द्रका रुपमा स्थापना गर्न विशेष कार्यक्रम ल्याउने भट्टराइको प्रतिवद्धतामा छ । जिल्लालाई कृषिमा आत्मनिर्भर बनाउने र कृषिमा आत्मनिर्भर बनाउनुका साथै तनहुँका जलविद्युत आयोजनाको शेयर हरेक परिवारले लिन पाउने व्यवस्था मिलाउनेमसेत भट्टराइले घोषणा गरेका छन् ।
नेपाली कांग्रेसका केन्द्रीय सदस्य एवं तनहुँ-१ प्रतिनिधिसभा सदस्य उम्मेदवार भट्टराइले विकासका योजना साकार पार्न जनताबाट अनुमोदित हुन चाहेको बताएका छन् । जिल्लाका विभिन्न ठाउँमा मतदातासँग भेट गर्दै भट्टराइले पदमा नहुँदा पनि विकासका लागि क्रियाशील रहँदै आएको उल्लेख गरे ।
उनले यो क्षेत्रमा ६० भन्दा बढी खानेपानी योजना ल्याएको दावी गरे । ‘तनहुँमा पानीको तिर्खा मेटाउने हुटहुटि थियो । तपाईं हामीले सँगै प्यास मेट्ने सपना देख्यौं । त्यो सपना पूरा गर्न दिनरात नभनी काम गरे’, उनले भने, ‘कुवा खोज्न कतिपटक जंगल चहारे । योजना स्वीकृत गर्न सयौं पटक मन्त्रालय चहारे । धेरै मेहेनतले, यो क्षेत्रमा ६० भन्दा बढि खानेपानी योजना ल्याएँ । तर, तनहुँको तिर्खा मेटिएको छैन् ।’
‘देखेका थुप्रै सपना साकार पार्नु छ । हाम्रा मुद्दालाई केन्द्रसम्म पुर्याउने अवसर रहेको छ’, उनले भने, ‘यस पटक मलाई हजुरहरूको साथको सबै भन्दा धेरै खाँचो छ । सधैँ जस्तो माया पाउने छु भन्ने विश्वास पनि छ ।’
