क्षयरोग सम्बन्धी अभिमुखिकरण
भञ्ज्याङ न्यूज
नेपाल क्षयरोग निवारण संस्था तनहुँले शनिबार दमौलीमा क्षयरोग सम्बन्धी अभिमुखिकरण कार्यक्रम गरेको छ । संस्थाका सभापति श्यामलाल गोशलीको अध्यक्षतामा आयोजित कार्यक्रममा क्षयरोगको अवस्था, संक्रमण र न्यूनिकरणका विषयमा छलफल गरिएको थियो ।
तनहुँमा क्षयरोगका २०१ बिरामी पहिचान भएका छन् । चालु आर्थिक वर्षको फागुन मसान्तसम्म जिल्लामा क्षयरोगका २०१ बिरामी पहिचान भएको स्वास्थ्य कार्यालय तनहुँको तथ्याङ्कमा देखाइएको छ । त्यसमध्ये नर्सर्ने खालका १३० रहेका छन् । जिल्लामा क्षयरोगको ८२.१ प्रतिशत उपचार सफल भएको स्वास्थ्य कार्यालयले जनाएको छ । छ महिना नियमित औषधि सेवन गरे क्षयरोग निको हुन्छ ।
क्षयरोगीको उपचारका लागि जिल्लामा ५० उपचार केन्द्र, नौ प्रयोगशाला छन् । अशिक्षा, अज्ञानता र भौगोलिक कारणले क्षयरोगी उपचारको पहुँचमा आउन नसकेको स्वास्थ्य कार्यालयले बताएको छ। क्षयरोगी पहिचान गरी उपचारको पहुँचमा ल्याउनुपर्ने विद्यमान चुनौती रहेको छ । समाजले हेलाको भावनाले हेर्ने गलत मानसिकताका कारण पनि क्षयरोगी रोग लुकाएर बस्ने गरेकाले आ-आफ्नो ठाउँबाट संकास्पद लक्ष्यण देखिएकालाई परीक्षणको दायारामा ल्याउन पहल गर्ने बैठकमा छलफल भएको संस्थका सचिव टिकाराम दाहालले जानकारी गराए ।
सन् २०५० सम्म नेपाल क्षयरोगविहीन बनाउने लक्ष्य छ । यसका लागि क्षयरोगका बिरामी पहिचान गरी उपचार गर्नुपर्ने बाध्यता रहेको छ । उपचारमा नरहेको एक क्षयरोगीले औषतमा दश देखि १५ स्वस्थ्य व्यक्तिलाई रोग र्सार्न सक्छ । क्षयरोगी पहिचानका लागि कार्यालयले शंका लागेका व्यक्तिको खकार संकलन गरी प्रयोगशालामा परीक्षण गर्ने व्यवस्था मिलाएको छ । दुइ हप्तासम्म खोकी लागेका शंकास्पद व्यक्ति पत्ता लागे घरमै पुगेर खकार संकलन गरी परीक्षणको व्यवस्था स्वास्थ्य कार्यालयले मिलाएको छ ।
नेपालमा ८० हजार क्षयरोगी छन् । वार्षिक पाँच हजारदेखि छ हजार ५०० सम्म क्षयरोगका कारणबाट मृत्यु हुने गरेको छ । ४४ हजार नयाँ बिरामी थपिने गरेकामा ३४ हजार बिरामी उपचारका लागि स्वास्थ्य संस्थासम्म पुग्ने गरेका छन् । १५ देखि ४९ वर्ष उमेर समूहका व्यक्ति क्षयरोगबाट संक्रमित हुने गरेको तथ्याङ्क छ ।
