तनहुँ समाज हङकङद्धारा मृगौला पीडितलाई ४ लाख ६० हजार सहयोग
विभिन्न रोगका कारण पीडित भएकाहरुको उपचारार्थ सहयोग गर्दै आएको तनहुँ समाज हङकङले मंगलबार एक युवालाई सहयोग गरेको छ । केही समयदेखि मगौला सम्बन्धी समस्याबाट पीडित बनेका तनहुँको व्यास नगरपालिका–५ पतेनीका २३ वर्षीय रुपेश नेपालीलाई समाजले आर्थिक सहयोग गरेको हो ।
नेपालीको उपचारार्थ समाजले ४ लाख ६० हजार रुपैयाँ आर्थिक सहयोग गरेको छ । समाजका सल्लाहकार कर्णबहादुर नेपालीको संयोजकत्वमा संकलित उक्त रकम विभिन्न शिलशिलामा हङकङ पुगेका ४९ जना तनहुँङ्गेबाट संकलन गरिएको हो । सहायक प्रमुख जिल्ला अधिकारी काशीराम गैरे तथा तनहुँ समाज हङकङका पूर्व अध्यक्ष द्धय जंग बहादुर थापा र भीमराज गुरुङले पीडितका बुबा रामबहादुर नेपालीलाई मंगलबार उक्त रकम हस्तान्तरण गरेको छ ।
पीडित रुपेशको १ महिना अघि मात्र भक्तपुर स्थित शहीद धर्मभक्त राष्ट्रिय प्रत्यारोपण केन्द्रबाट मृगौला प्रत्यारोपण गरिएको हो । उनलाई उनकै बुबा रामले मृगौला दान गरेका हुन् ।
सहायक प्रमुख जिल्ला अधिकारी गैरेले गम्भिर प्रकृतिका रोग लागेका नागरिकको उपचारमा राज्यले पनि ठुलो राहत उपलब्ध गराउन नसकिरहेको अवस्थामा समाजले उल्लेखनीय योगदान गरेको बताए । समाजले सेवा गरि धेरै विपन्न परिवारको आशिवार्दसँगै जीवनभर आत्मसन्तुष्टि र आनन्द प्राप्त गर्ने काम गरिरहेको उनले चर्चा गरे । आफुहरुले दुखसुख गरि कमाएको रकम निम्न वर्गीय पविारको उपचारार्थ सहयोग गरि दुखको सारथी बन्न सफल भएको भन्दै उनले संस्थाप्रति आभार समेत व्यक्त गरे ।
समाजका पूर्व अध्यक्ष थापाले पीडित परिवारबाट प्राप्त निवेदनका आधारमा रकम संकलन गरि उपचारमा सहयोग गर्दै आएको बताए । “हाम्रो संस्थासँग धेरै जनाले सहयोगको अपिल गरिरहनु भएको हुन्छ, हामीले पीडितको अवस्था र हाम्रो क्षमता अनुसार निरन्तर सहयोग उपलब्ध गराउदै आएका छौँ”, उनले भने ।
साथै समाजका पूर्व अध्यक्ष भीमराज गुरुङ्गले हङकङमा रहेका तनहुँङ्गेहरुको एकताकै कारण ठुलो रकम संकलन गरि पीडितलाई राहत रकम उपलब्ध गराउन सफल भएको बताए । साथै प्राप्त रकमको सदुपयोग गर्न उनले पीडितका परिवारलाई आग्रह समेत गरे ।
समाजले १२ वर्ष देखि निरन्तर तनहुँको विभिन्न क्षेत्रमा सहयोग गर्दै आएको समाजका कार्यक्रम संयोजक प्रदीप काफ्लेले जानकारी दिए । सुरुका दिनमा शैक्षिक क्षेत्रमा सहयोग गर्दै आएको समाजले अहिले हरेक २– ३ महिनाको अन्तरालमा गम्भिर प्रकुतिका रोगबाट पीडित बनेकाको उपचारमा सहयोग गर्दै आएको छ ।
तनहुँ समाज हङकङले हालसम्म ९ जना मृगौला पीडित, एक जना मुटु रोगी, करेण्ट लागेर हात गुमाएका एक जनालाई र एक जना क्यान्सर पीडितलाई गरि लाखौं सहयोग गरिसकेको छ । यसका साथै विभिन्न प्राकृतिक प्रकोपबाट पीडित भएकाहरुलाई पनि समाजले सहयोग गर्दै आएको छ ।
समाजले ०७२ सालको भुकम्पपछीको पुननिर्माण, कोभिड नियन्त्रण र न्युनिकरण, जिल्लाको शिक्षा, स्वास्थ्य र खानेपानी, सञ्चार र पर्यटनका क्षेत्रमा पनि सहयोग गर्दै आएको छ ।
