बन्दीपुरका टोल-टोलमा विशेषज्ञ चिकित्सक सहितको स्वास्थ्य सेवा

तनहुँको बन्दीपुर गाउँपालिकाले टोल-टोलमा विशेषज्ञ चिकित्सक सहितको स्वास्थ्य सेवा सञ्चालन गरेको छ । गाउँपालिकाले सोमबार वडा नं. ६ को ग्याजाटार, बाग्थलमा विशेषज्ञ चिकित्सक सहितको स्वास्थ्य सेवा प्रदान गरेको छ ।

गाउँपालिकाले उक्त वडाका टोलटोलमा आँखा जाँच शिविर सञ्चालन गरेको थियो । उक्त शिविरमा ९३ जनाको स्वास्थ्य तथा आँखा परीक्षण गरिएको थियो । शिविरमा आएका ज्येष्ठ नागरिकले स्वास्थ्यकर्मीहरू टोल टोलमा आएर आफ्नो जाँच गरिंदिदा स्वास्थ्य संस्थामा ठूलो रकम खर्च गरी धाउनुपर्ने बाध्यता हटेको बताएका थिए ।

गाउँपालिकाले ज्येष्ठ नागरिकहरूको स्वास्थ जटिलतालाई मध्यनजर गरेर टोलमा नै पुगेर उनीहरूको स्वास्थ्य परीक्षण गर्न सुरु गरेको गाउँपालिकाका अध्यक्ष सुरेन्द्रबहादुर थापाले बताए । वडामा रहेका स्वास्थ्य संस्थाहरूमा पुग्न ज्येष्ठ नागरिकले धेरै दुःख गर्नुपर्ने भएकाले बन्दीपुर अस्पतालमा कार्यरत डाक्टरहरु सहित गाउँपालिका अर्न्तर्गत कार्यरत स्वास्थ्यकर्मीहरूलाई पालो र तालिका अनुसार स्वास्थ्य संस्थाहरुको पहुँचबाट टाढा रहेका टोलहरुमा पठाउने गरिएको अध्यक्ष थापाले बताए ।

उनले भने, ‘निश्चित टोलका ज्येष्ठ नागरिकहरूलाई एकै ठाउँमा भेला पारेर सबैलाई एकै ठाउँबाट सेवा दिँदा उनीहरूले लामो दूरी हिँड्नु नपर्ने गरी टोल टोलमा नै स्वास्थ्य शिविरको व्यवस्थापन गरिएको छ ।’

‘एउटै पालिका भए पनि एउटा गाउँका वृद्ध बुबाआमालाई अर्को गाउँमा रहेको स्वास्थ्य चौकीमा पुगेर स्वास्थ्य परीक्षण गरेर आउँदा दिन नै जान्छ । स्वस्थ भए त हिँड्न सक्नुहोला । बुढेसकालमा घुँडा दुख्ने, दम हुने, आँखा नदेख्ने, ढाडका समस्या धेरैमा हुन्छन’, अध्यक्ष थापाले भने ‘यस्ता समस्या भएका नागरिकहरू स्वास्थ्य संस्थासम्म हिँडेर जान सक्ने अवस्था रहँदैन । गाउँमा वडाबाट वडा जोड्ने गरी सवारीहरू चल्दैनन् । सबैका घरमा सवारी पनि छैनन् । ग्रामीण क्षेत्रमा एउटा गाउँबाट अर्को गाउँमा जाने सवारी छैनन् ।’

शिविरमा ज्येष्ठ नागरिक सहित सबैको निःशुल्क र अनिवार्य रूपमा स्वास्थ्य जाँच गरिने गाउँपालिकाका प्रमुख प्रशासकीय अधिकृत नवेशराज हमालले बताए । सर्ने भन्दा पनि गाउँगाउँमा नर्सर्ने रोगले भित्रभित्रै कमजोर पारिरहेकोबारे व्यक्ति बेखबर रहँदा जटिल स्वास्थ्य समस्याहरू अचानक देखा पर्ने हुँदा यसरी अभियानकै रुपमा स्वास्थ्य शिविर सञ्चालन गरिएको उनले बताए ।

यो अभियानका लागि स्वास्थ्यकर्मीहरूलाई कामको चाप बढी हुने भए नि उनीहरू पनि तयार रहेको प्रमुख प्रशासकीय अधिकृत हमालले बताए । महिनामा २ पटक गाउँपालिका अन्तर्गत स्वास्थ्य संस्थाको पहुँच नपुगेको टोलमा पुगेर शिविर चलाएर ज्येष्ठ नागरिकको स्वास्थ्य परीक्षण गर्ने गरिएको बन्दीपुर गाउँपालिकाका स्वास्थ्य शाखा प्रमुख अन्जिर भट्टराइले बताए । उनले भने, ‘स्वास्थ्यकर्मीहरूबाट स्वास्थ्य परीक्षण, परामर्श सेवा, सामान्य उपचार सेवा र प्रेषण सेवा प्रदान हुन्छ । शिविरबाट टोल टोलमा आधारभूत स्वास्थ्य सेवा पनि प्रदान गरिएको छ ।’

भट्टराइका अनुसार नर्सर्ने रोगसम्बन्धी प्रारम्भिक पहिचानमा केन्द्रित हुने शिविरहरू गाउँपालिकाका ६ वटा वडामा रहेका ५० भन्दा बढी टोलमा केन्द्रित हुनेछन् । एउटा टोलमा कम्तिमा पनि ३ महिनामा एक पटक डाक्टर सहित स्वास्थ्यकर्मीहरूको टोली पुर्‍याउने गरी गाउँपालिकाले योजना बनाएको उनले बताए ।