घिरिङ गाउँपालिकाको प्रशासकीय भवन उद्घाटन
भञ्ज्याङ न्यूज
तनहुँको घिरिङ गाउँपालिकाको प्रमुख प्रशासकीय भवनको उद्घाटन गरिएको छ । गण्डकी प्रदेशका पूर्व अर्थमन्त्री किरण गुरुङले सोमबार एक कार्यक्रमका बीच भवनको उद्घाटन गरेका हुन् । नेकपा एमाले स्थायी कमिटी सदस्य समेत रहेका गुरुङले अहिले परमादेशको आधारमा बनेको सरकारले केही काम गर्न नसकेको आरोप लगाए ।
उनले भने, ‘अहिलेको सरकारले नाटक मन्चन गर्दै पेट्रोलियम पदार्थको मूल्य वृद्धि गरी जनतालाई ऋणको भारी बोकाएर नेपालको अर्थतन्त्र समाप्त गरेको छ ।’ उनले विकासका लागि एमालेको सरकार आवश्यक भएको बताउँदै वर्तमान सरकारले जनतालाई सास्ती दिने काम गरी अर्थतन्त्र जोखिममा पुर्याएको समेत आरोप लगाएका छन् ।
घिरिङ गाउँपालिका-३ पोखरीछापमा निर्माण गरिएको तीन तलाको भवनको पहिलो चरणमा एक तला निर्माण गरिएको गाउँपालिकाका अध्यक्ष रनबहादुर रानाले बताए । पहिलो चरणमा दुइ करोडको लागतमा भवन निर्माण गरिएको हो ।
गाउँपालिकाले हाल भाडाको घरबाट सेवा प्रवाह गरिरहेको थियो । आफ्नै भवन नहुँदा सेवा प्रवाहमा असहजता उत्पन्न भइरहेकोले प्रदेश सरकारसँगको समन्वयमा भवन निर्माण गरिएको अध्यक्ष रानाले बताए ।
भवन उद्घाटन समारोहमा नेकपा एमाले प्रदेश कमिटी अध्यक्षद्वय होम बहादुर थापा र बिष्णु भक्त सिक्देल, नेकपा माओवादी केन्द्रका प्रदेश कमिटी सदस्य मदन आले, एमाले जिल्ला सचिब राजेस्वर ढकाल, एमाले जिल्ला सदस्य इन्द्र थापा, एमाले घिरिङ्ग गाउँकमिटी अध्यक्ष बिष्णु प्रसाद ढकाल, वडा नं. ३ का वडा अध्यक्ष रण बहादुर गुरुङ, अनेरास्ववियु नेता आरके पोख्रेल लगायतले आ-आफ्ना विचार व्यक्त गरेका थिए ।
गाउँपालिकाको प्रशासकीय भवन निर्माणका लागि आवश्यक जग्गा उपलब्ध गराउने जग्गा दाताहरूलाई दोसल्ला र प्रमाणपत्र प्रदान गरी सम्मान गरिएको गाउँपालिकाकी उपाध्यक्ष सरस्वती सिग्देलले बताइन् ।
यस्तै, भवन पूर्ण रुपमा निर्माण सम्पन्न नगरी उद्घाटन गरेको भन्दै नेपाली कांग्रेस घिरिङ्ग गाउँ कार्यसमितिले विज्ञप्ति जारी गरी विरोध जनाएको थियो ।
