पार्टीभित्र एकता हुन जुरुरी छ : कांग्रेस सभापति देउवा
भञ्ज्याङन्यूज
नेपाली कांग्रेसका सभापति एवं पूर्वप्रधानमन्त्री शेरबहादुर देउवाले पार्टीभित्र एकताको खाँचो रहेको बताएका छन् । नेपाली कांग्रेस तनहुँले आज दमौलीमा आयोजना गरेको जिल्ला सम्मेलन तथा विपि स्मृती भवन उद्घाटन कार्यक्रमलाई सम्बोधन गर्दै उनले उक्त कुरा बताएका हुन् ।
‘पार्टीलाई बलियो बनाउन पार्टीभित्र समझदारी र एकताको खाँचो रहेको छ’, उनले भने, ‘पार्टी बलियो बनाएर अघि बढ्न सकेमात्र देशको ठूलो र शक्तिशाली पार्टी बन्न सकिन्छ ।’
‘अहिलेको संविधानका कारण एउटै पार्टीको बहुमत आउने अवस्था नरहेकाले चुनावमा गठबन्धन गरेर जानुपरेको आवश्यकता र बाध्यता रहेको छ’, सभापति देउवाले भने, ‘संघीय लोकतान्त्रिक गणतन्त्रलाई सुदृढ बनाउनका लागि दलबीच सहमति र सहकार्यको आवश्यकता छ ।’
सभापति देउवाले समावेशी संविधानका कारण एउटै पार्टीको बहुमत सहजै आउने अवस्था नरहेको हुँदा गठबन्धन गरेर जाँदा कांग्रेस ठूलो शक्तिका रुपमा निर्माण गर्न सकिने बताए ।
‘आफ्नै पार्टी भित्र सच्चा मानवीयता रहयो र मनोमानी हट्यो भने नेपाली कांग्रेसले बहुमत ल्याउन नसकेपनि ठूलो पार्टी बन्छ’, सभापति देउवाले भने, ‘नेता तथा कार्यकर्ताहरु अहिले टिकट र अवसर पाइन भन्दै मनोमानी नगरी इमान्दार बन्न आवश्यक छ ।’
यस्तै, कार्यक्रममा कांग्रेस उपसभापति एवं कानुन, न्याय तथा संसदीय व्यवस्थामन्त्री धनराज गुरुङले सहमति, सहकार्य र समझदारी अहिलेको आवश्यकता रहेकोमा जोड दिएका छन् । उनले देशको प्रमुख समस्या अशिक्षा, गरिबी र भ्रष्टाचार भएकाले यसको अन्त्यका लागि कांग्रेस, एमाले र माओवादी मिल्नुको विकल्प नभएको बताएका छन् ।
तीन दलबीचको एकताबाट मात्र मुलुक समृद्ध हुने बताउँदै मन्त्री गुरुङले विस्तृत शान्ति सम्झौतादेखि हालसम्म भएका उपलब्धी तीन दलको एकताले भएको र त्यो एकता अझै आवश्यक रहेको बताए ।
आठ आना क्षेत्रफलमा करिब दुइ करोड रुपैयाँका लागतमा निर्माण गरिएको भवन उद्घाटन समारोहमा सभापति देउवाले भवन निर्माणका लागि सहयोग गर्ने चन्दादाता एवं जग्गादाताहरुलाई सम्मान गरिएको जिल्ला सभापति जितप्रकाश आलेले बताए ।
कार्यक्रममा पूर्वमहामन्त्री डा शशांक कोइराला, गण्डकी प्रदेशका मुख्यमन्त्री सुरेन्द्रराज पाण्डे, केन्द्रीय सदस्य शंकर भण्डारी, प्रदीप पौडेल, गोविन्द भट्टराइ लगायत कार्यक्रममा सहभागि भएका थिए ।
