एमालेका उम्मेदवार भन्छन् : देश र जनताको समृद्धि र सुखशान्तिका लागि हाम्रो उम्मेदवारी
भञ्ज्याङ समाचारदाता/तनहुँ
आसन्न प्रतिनिधिसभा र प्रदेशसभा सदस्य निर्वाचनका लागि तनहुँबाट उम्मेदवारी मनोनयनपत्र दर्ता गराएका नेकपा एमालेका उम्मेदवारहरुले देश र जनताको समृद्धि र सुखशान्तिका लागि हाम्रो उम्मेदवारी भएको बताएका छन् ।
तनहुँ निर्वाचन क्षेत्र नं. १ को दमौली स्थित मुख्य निर्वाचन अधिकृतको कार्यालय र निर्वाचन क्षेत्र नं. २ को दुलेगौंडा स्थित निर्वाचन अधिकृतको कार्यालयमा आइतबार प्रतिनिधिसभा र प्रदेशसभा सदस्यमा उम्मेदवारी मनोनयनपत्र दर्ता गराएपछि उम्मेदवारहरुले उक्त प्रतिक्रिया दिएका हुन ।
नेकपा (एमाले)ले तनहुँ क्षेत्र नं. १ को प्रतिनिधिसभा सदस्यमा एक बहादुर रानाले उम्मेदवारी दिएका छन् । प्रदेशसभा सदस्य (क) मा रामबहादुर गुरुङ र (ख) मा पूर्णबहादुर गुरुङले उम्मेदवारी दर्ता गराएका छन् ।
तनहुँ क्षेत्र नं. २ को प्रतिनिधिसभा सदस्यका लागि नेकपा एमालेका स्थायी कमिटी सदस्य किरण गुरुङले उम्मेद्वारी दर्ता गराएका छन् । प्रदेशसभा सदस्यका लागि (क) मा श्यामराजा महत र (ख) मा केदार सिग्देलले उम्मेद्वारी दर्ता गराएका छन् ।
उम्मेदवारी दर्ता गराउँदै नेकपा एमालेका उम्मेदवारहरुले ‘समृद्ध नेपाल, सुखी नेपाली’ हामी प्रत्येक नेपालीको इच्छा, आकाङ्क्ष र चाहना हो, हामीले देख्ने एउटै साझा सपना पनि भएकाले त्यसलाई पूर्ण गर्ने हाम्रो साझा दृष्टिकोण, लक्ष्य, उद्देश्य र संकल्पका साथ उम्मेदवारी दिएको बताएका छन् ।
तनहुँ क्षेत्र नम्बर २ को प्रतिनिधिसभा सदस्यका लागि उम्मेदवारी दिएका एमाले स्थायी कमिटी सदस्य किरण गुरुङले आफु र आफ्नो पार्टीबाट उम्मेदवार बनेकाहरुको धारणा बारे प्रष्ट पारेका छन् ।
गुरुङले आफ्नो पार्टीको उम्मेदवारी सम्पूर्ण रूपमा मुलुकको राजनीतिक स्थायित्व र स्थिरता, राष्ट्रिय स्वाभिमान र अखण्डता, मुलुकको समृद्धि र अग्रगामी परिवर्तन, देश र जनताको सार्वभौमिकता, संविधानको रक्षा र कार्यान्वयन, नीति र कानुन निर्माण, विधि र सुशासनको निम्ति भएको उल्लेख गरेका छन् ।
गुरुङले भनेका छन्, ‘आगामी प्रतिनिधि सभा तथा प्रदेश सभा निर्वाचनमा नेकपा (एमाले)को तर्फबाट तनहुँ क्षेत्र नम्बर २ मा उम्मेदवारी मनोनयन दर्ता गरेको छु । तपाईंहरूबाट सदैव माया, स्नेह र सद्भाव प्राप्त गरेकैछु, फेरि पनि यसपटक तपाईंहरूको बलियो साथ र समर्थनको अपेक्षा गरेको छु ।’
गुरुङले भनेका छन्, ‘आफ्नो क्षमता, बुद्धि र विवेकले भ्याएसम्म इमान्दारितापूर्वक जनप्रतिनिधिको भूमिका निर्वाह गर्ने प्रतिबद्धता व्यक्त गर्दछु । ‘समृद्ध नेपाल, सुखी नेपाली’ हामी प्रत्येक नेपालीको इच्छा, आकाङ्क्ष र चाहना हो, हामीले देख्ने एउटै साझा सपना पनि हो । त्यसलाई पूर्ण गर्ने हाम्रो साझा दृष्टिकोण, लक्ष्य, उद्देश्य र संकल्पमा म दृढ रहनेछु ।’
‘इमान्दारिता मेरो राजनीतिक जीवनको ठूलो सम्पत्ति हो । देश र जनता, राष्ट्र र राष्ट्रियता तथा लोकतन्त्र र परिवर्तनको पक्षमा मेरो सक्रियता, त्याग र बलिदान मेरो जीवनको अभिन्न अङ्ग हुन् भन्ने लाग्छ, जुन तथ्य यहाँहरू समक्ष लुकेको छैन’, उम्मेदवार गुरुङले भनेका छन्, ‘उच्च मनोबलका साथ, देश र जनताको आकाङ्क्ष अनुरूप, मुलुकको अग्रगामी परिवर्तन अर्थात् समृद्धिकरुो बाटोमा अविश्राम गतिमा लागि रहने प्रण गर्दछु । विकास, फेरि विकास र निरन्तर विकास तथा परिवर्तन, फेरि परिवर्तन र अग्रगामी परिवर्तन मेरो गति हो ।’
