क्यान्सर पीडित बिनुमायाद्वारा आर्थिक सहयोगको याचना
भञ्ज्याङन्यूज
तनहुँको देवघाट गाँउपालिका-२ स्थायी घर भई हाल व्यास नगरपालिका-५, पिपलटारमा बस्दै आएकी क्यान्सर पीडित ४९ वर्षीया बिनुमाया गुरुङले उपचारको लागि आर्थिक सहयोगको याचना गरेकी छन् । कलेजोको क्यान्सरबाट पीडित उनले आफ्नो आर्थिक अवस्था निकै कमजोर रहेको हुँदा उपचारकोलागि आर्थिक सहयोग गरिदन् अनुरोध गरेकी छन् ।
मुटु पोल्ने तथा पेट फुल्ने समस्या देखिएपछि पोखराको मणिपाल अस्पतालमा उपचार गराएकी गुरुङले वीपी कोईराला क्यान्सर अस्पताल भरतपुरमा पुगेर परीक्षण गर्दा कलेजेको क्यान्सर पुष्टि भएको थियो ।
आर्थिक अवस्था अत्यन्त कमजोर रहेकी गुरुङको स्वास्थ्य उपचारका लागि ठुलो रकम खर्च भईसकेको र थप उपचारका लागि आर्थिक अभाव भएकाले सहयोगको लागि सबैसँग अनुरोध गरिएको बिनुमायाका श्रीमान दलबहादुर गुरुङले बताए । आफ्नो नाममा जग्गा नभएका उनीहरु हाल अर्काको जग्गामा बस्दै आएका छन् । १ छोरा र २ छोरी रहेका गुरुङको छोरा वैदेशिक रोजगारीको शिलशिलामा विदेशमा छन् ।
दैनिक ज्याला मजदुरी गरी जिविकोपार्जन गर्दै आएको गुरुङ परिवारमा श्रीमतीको कलेजोको क्यान्सर देखिएपछि कसरी उपचार गर्ने भन्ने पीडामा रहेको श्रीमान दलबहादुरले बताए । हालसम्म ऋण गरेर करिब २ लाख रुपैयाँ उपचारमा खर्चिसकेका गुरुङ दम्पतीले थप उपचारका लागि सहयोग जुर्टाईदिन आग्रह गरेका छन् ।
