म्याग्देद्वारा दैनिक ज्यालादारी गर्नेलाई घरमै खाद्यान्न सहयोग
भञ्ज्याङ न्यूज
तनहुँको म्याग्दे गाउँपालिकाले आर्थिक अवस्था कमजोर भएका र दैनिक ज्यालादारी गरी परिवार पाल्ने कोभिड प्रभावित परिवारलाई खाद्यन्न सहयोग गरिएको छ । ज्यालामजदुरी गरी खाने पालिकाबासिलाई कोरोना लागेमा उनिहरुको समस्या हेरी राहत वितरण गरिएको गाउँपालिकाकि अध्यक्ष मायादेवी रानाले बताइन् ।
पीडितको घरमै पुगि चामल, दाल, आलु, नुनतेल लगायतका खाद्यान्न सामग्री उपलब्ध गर्ने गरिएको अध्यक्ष रानाले बताइन् । अहिले कोरोना बजारबाट गाउँमा सरेको भन्ने पछिल्लो तथ्याङ्कले देखाएको छ, यस्तोमा गाउँमा बस्ने मानिसहरू सावधानीपूर्वक बस्न उनले आग्रह गरेकी छन् ।
गाउँपालिकाले अहिलेसम्म करिव ५० घर परिवारलाई खाद्यान्न राहत दिइएको गाउँपालिकाका उपाध्यक्ष बालकृष्ण घिमिरेले बताए । पालिका भित्रका कमजोर अवस्थामा रहेका र त्यस्तो परिवार भित्रका सदस्यहरूमा संक्रमित भएमा पालिकाले सहयोग गर्दै आएको घिमिरेले बताए । संक्रमित र संक्रमितको परिवारलाई सान्त्वना तथा हौसलासँगै राहत दिनको लागि घर घरमा पुगि भेट गरिएको गाउँपालिकाको स्वास्थ्य शाखा प्रमुख तिलक घिमिरेले बताए ।
