वडाध्यक्षले गरे सेवाग्राही माथि हातपात, राजनीतिक प्रतिशोध साँधेर फसाउन खोजियो : वडाध्यक्ष श्रेष्ठ
तनहुँको भिमाद नगरपालिका-८ का वडाध्यक्षले एक सेवाग्राही माथि हातपात गरेका छन् । वडा कार्यालय अरौंदीस्थित नवदूर्गा टोलमा बिहान ११ बजे वडाध्यक्ष बुद्धिमान श्रेष्ठले सोही वडाबासी चिरञ्जीवी खनाललाई हातपात गरेका हुन् । खनाललाई वडाध्यक्ष श्रेष्ठले मुक्का प्रहार गरेको भिडियो सामाजिक सञ्जालमा समेत अपलोड भएको छ ।
सामाजिक सञ्जालमा राखिएको भिडियोमा सेवाग्राही खनालले आफुमाथि गरेको अभद्र क्रियाकलापको भाग हटाएर आफूलाई राजनीतिक प्रतिशोध साँधेर फसाउन खोजेको वडाध्यक्ष श्रेष्ठले बताएका छन् ।
हकवालाको सिफारिस लिन पुगेका खनाललाई वडाध्यक्ष श्रेष्ठले हातपात गरेको आरोप लागेको छ। तर वडाअध्यक्ष श्रेष्ठले भने खनालले आफुमाथि अपशब्द बोली हातपात गरेपछि प्रतिरक्षामा उत्रनुपरेको बताएका छन् ।
सोही वडामा बसोवास गर्ने सावित्रि दमै नामकी एकल अपांगता भएकी महिला करिब २० वर्षेखि बस्दै आएको जमिन सेवाग्राही खनालले आफ्नो भनि दावी गर्न थालेपछि वडाध्यक्ष र खनाल बीच विवाद सृजना भएको बताइएको छ । ‘२०७२ सालको गोरखा भुकप्पले सावित्रीको घर भत्काएपछि वडाबाट पहिलो र दोस्रो किस्ता लिएर सोही जग्गामा घर बनाउूदै गर्दा खनालले आएर रोकेका छन् । घर बनाउन रोकेपछि वडा कार्यालयमा खनालमाथी ती महिलाले उजुरी हालेकी छन्’, वडाध्यक्ष श्रेष्ठले बताए ।
‘एकल महिलाको बसोवासका लागि सबै मिलेर छलफल गरौ भन्दा खनाल मान्दै नमानी मेरो काम गर्दिनुस् म जान्छु भोली छलफल गरौला भन्न थाले’, वडाध्यक्षले भने, ‘उजुरी परेको छ आजै टुङ्गो लगाउ भन्दा म दिंदै दिन्न मेरो जग्गा भन्दै अपशब्द प्रयोग गरी म माथी जाइलागे ।’
खनाल हातपातमा उत्रिएपछि प्रतिरक्षा गरेको बताउँदै वडाअध्यक्ष श्रेष्ठले भने, ‘फोटो र भिडियोमा सेवाग्राहीको व्यवहार नदेखाइ मेरो मात्र खिचियो । कसरी हुन्छ मलाई फसाउने र मेरो चरित्रहत्या गर्ने हिसावमा भिडियो खिचेर र्सार्वजानिक गरिएको छ ।’
यता सेवाग्राही खनाल भने, आफु अन्तिमसम्म नम्र भएर बोल्दापनि वडाध्यक्षले नै हातपात गरेको आरोप लगाएका छन् । खनालले भने, ‘म हकवालाको सिफारिस लिन गएको थिए, वडामा सबै काम भएर राजश्व पनि तिरेर रसिद लिइसकेको थियो । सिफारिस पत्रमा हस्ताक्षरका लागि वडाअध्यक्षको कार्यकक्षमा गएको तर उहाँले हस्ताक्षर गर्न मान्नुभएन । उहाँले उल्टै मेरो जग्गामा अर्कैलाई घर बनाउन दिनुपर्छ भन्न थाल्नु भयो ।’
खनालले भने, ‘यो विषयमा भोली आएर सल्लाह गरौला आज मलाई हतार छ मेरो यति काम गर्दिनुस् भन्दा, छलफल नगरी हस्ताक्षर गर्दिन भन्नुभयो । उसोभए यो रसिद लिनु र मैले तिरेको पैसा फिर्ता दिनुस भन्दा उल्टै मसंग झर्किएर अपशब्द बोल्दै हातपातमा उत्रिनु भयो ।’
यस घटनाका विषयमा भिमाद नगरपालिकाका नगरप्रमुखले घटनाको सत्यतथ्य छानविन गरी दोषीलाई कारवाही गर्ने बताएका छन् । उनले भने, ‘सामाजिक सञ्जालमा राखिएको तस्विर र भिडियो एकपक्षीय ढंगले राखिएको देखिएको छ । यस विषयमा दुबै पक्षसंग छलफल गरी सत्यतथ्य के हो भनि पहिचान गरी सोही अनुसार कारवाही अगाडि बढाउने छौं ।’
