बजेट अभावमा भिमादको नगर अस्पतालको काम रोकियो
भञ्ज्याङन्यूज
तनहुँको भिमाद नगरपालिका-६ मा निर्माणाधिन भिमाद अस्पतालको भवन बजेट अभावका कारण भवन निर्माण कार्य रोकिएको छ । भिमाद प्राथमिक स्वास्थ्य केन्द्रलाई नगरस्तरीय अस्पतालका रुपमा स्तरोन्नति गरी १५ शय्याको अस्पताल बनाउन भवन निर्माण थालिए पनि पर्याप्त बजेट नहुँदा काम रोकिएको भिमाद नगरपालिकाका प्रमुख दधिराज सुवेदीले बताएका छन् ।
एघार करोड ५२ लाख ९ हजार ९६३ रुपैयाँको लागतमा भवन निर्माण थालिएको थियो । हालसम्म भौतिक र वित्तीय प्रगति २५.६ प्रतिशत मात्र भएको छ । नगरपालिकाका लेखा अधिकृत अर्जुन पौडेलका अनुसार निर्माण कम्पनीलाई दुइ करोड ९४ लाख ९३ हजार १५९ रुपैयाँ भुक्तानी गरिएको छ ।
भवन निर्माणका लागि नेपाल सरकार र राजेन्द्र दिवस ज्येवाडण्डा जेभी कन्ट्रक्सनबीच २०७८ असार २५ गते ठेक्का सम्झौता भएको थियो । सम्झौता अनुसार २०७९ माघभित्र निर्माण सम्पन्न गर्नुपर्ने भएपनि सो अवधिमा काम पूरा नभएकाले पुनः २०८१ साल असोज २४ गतेसम्मका लागि म्याद थप गरिएको निर्माण कम्पनीका सञ्चालक किरण लामाले बताए ।
बजेट समयमै निकासा नहुँदा काम गर्न समस्या भएकाले त्यसतर्फसम्बन्धित पक्षले ध्यान दिनुपर्नेमा उनले बताए ।
