ऋषिङलाई जातीय छुवाछूतमुक्त बनाइने
भञ्ज्याङन्यूज
“जातीय विभेद गर्न हुँदैन भनेर भाषण गरेर मात्रै समाजबाट छुवाछूत हट्दैन”, ऋषिङ गाउँपालिका-३ दुवुङस्थित मगर गुठ समाजका अध्यक्ष लालबहादुर आलेमगरले भने “सबै जात एउटै हो भन्ने कुरा अब व्यवहारमै देखिनुपर्छ । बल्ल जातीय विभेद र छुवाछूतमुक्त समाज बनाउन सकिन्छ ।”
ऋषिङ गाउँपालिकाको कार्यालयले पालिकालाई जातीय विभेद र छुवाछूतमुक्त बनाउने अभियानमा गरिएको सुझाव संकलनका क्रममा गुठी समाजका अध्यक्ष आलेमगरले आफूहरूले जातीय विभेद र छुवाछूतमुक्त समाज बनाउन गुठ समाजमा दलितहरू समेत मिसाएको बताए। दुवुङमा रहेका ६५ घर मगरहरूसँगै छ घर दलितलाई समावेश गरेर मगर गुठ बनाइएको अध्यक्ष आलेमगरको भनाइ छ ।
ऋषिङ गाउँपालिकालाई जातीय विभेद र छुवाछूतमुक्त बनाउने अभियानका क्रममा ऋषिङ १, २, ३, ४ र ५ मा र्सवपक्षीय कार्यक्रम गरिसकिएको पालिकाले जनाएको छ । अभियानका क्रममा दलित, शिक्षक, महिला, कर्मचारी, जनजातिलगायत सँग परामर्श, छलफल गरिएको थियो । ऋषिङ-१ झापुटारमा वडाअध्यक्ष कुशबहादुर थापा, ऋषिङ-२ काहुँशिवपुरमा वडाअध्यक्ष दलबहादुर थापा, ऋषिङ-३ दुवुङमा वडाअध्यक्ष भीमबहादुर थापा, ऋषिङ-४ भिरकोटमा वडाअध्यक्ष प्रेमराज श्रेष्ठ र ऋषिङ-५ राम्जाकोटमा वडाअध्यक्ष बुद्धिमान रानामगरलगायत पालिका अध्यक्ष राजेन्द्रकृष्ण श्रेष्ठ, पालिका उपाध्यक्ष गिनुमाया थापा र पालिकाका प्रमुख प्रशासकीय अधिकृत चिनबहादुर रानाभाट लगायतले सहभागीबाट उठेका जिज्ञासाको समाधान र सुझावअनुसार आगामी कार्यक्रम तय गर्न आफूहरू प्रतिबद्ध रहेको बताउनुभएको कार्यपालिका सदस्य दिलबहादुर नेपालीले बताए ।
समाजको कलङ्कका रूपमा रहेको जातीय विभेद र छुवाछूतलाई हटाउन आफूहरूको साथ र सहयोग रहने ऋषिङ-१ झापुटारस्थित शुक्ला माविका प्रधानाध्यापक केशर थापामगरले बताए । “ऋषिङ गाउँपालिकाको कार्यालयले छुवाछूत हटाउन गरेको कार्यक्रमलाई सकारात्मक रूपमा लिएको छु”, प्रधानाध्यापक थापामगरले भने, “वैज्ञानिक समाजमा पनि जातीय विभेद हामीले मान्ने कुरा हुँदैन । यसलाई हटाउन सबै जुट्न आवश्यक छ।”
दलित समुदायलाई मात्रै भेला गरी कार्यक्रम गर्दा प्रभावकारी नहुने भएकाले दलित र गैरदलितसहितको कार्यक्रम गरी छुवाछूत र जातीय विभेद अन्त्य गर्न छलफल गरिएको ऋषिङ गाउँपालिकाका अध्यक्ष राजेन्द्रकृष्ण श्रेष्ठले बताए । पालिकालाई पाँच वर्षभत्र छुवाछूत र जातीय विभेदमुक्त बनाउन विद्यालय, स्वास्थ्य संस्था र समुदायस्तरबाट अभियान व्यापक गर्ने गरी छलफल थालिएको पालिकाका अध्यक्ष श्रेष्ठले जानकारी दिए ।
आफू जहिल्यै ऋषिङको जनताको आवश्यकता र विकासको पक्षमा रहेकाले कहिल्यै ऋषिङको जनता र विकासप्रति धोका र घात नगर्न प्रतिबद्ध रहेको अध्यक्ष श्रेष्ठको प्रतिबद्धता छ । “जातीय विभेद र छुवाछूतलाई साथमा लिएर समृद्ध ऋषिङ गाउँपालिका बनाउन सकिने कुरा भएन”, अध्यक्ष श्रेष्ठले भने “त्यसैले सबै वडाबाट छुवाछूत र जातीय विभेदविरुद्धको अभियान थालेका हौँ ।”
अभियानका क्रममा शिक्षक, विद्यार्थी, युवा, महिला, दलित लगायत अपाङ्गता भएकाहरू, टोल विकास संस्थाका प्रमुख तथा प्रतिनिधिहरूसँग समेत परामर्श गरिएको र सोही सल्लाह, सुझाव अनुसार आगामी कार्यक्रम तय गरिने पालिका अध्यक्ष श्रेष्ठको भनाइ छ ।
