तनहुँको तनहुँसुर दरबार परिसरमा नेपाली सेनाद्वारा सरसफाइ
तनहुँको ऐतिहासिक स्थल तनहुँसुर दरबार परिसरमा नेपाली सेनाको एक टोलीले सरसफाई गरेको छ । तनहुँको व्यास नगरपालिका-५ चापाघाटस्थित नेपाली सेनाको कालीभञ्जन गण (इ) ले ऐतिहासिक तनहुँसुर दरबार परिसर सरसफाइ गरेको हो ।
गणतन्त्र दिवसको अवसर पारेर गणले आज बिहान व्यास नगरपालिका-११ स्थित तनहुँसुर दरबार परिसरमा सरसफाइ गरेको छ । तनहुँसुर ऐतिहासिक तथा पर्यटकीय स्थल भएको र यसको सुन्दरतालाई कायम राख्नका लागि सेनाको टोलीले सरसफाइ गरेको बताइएको छ ।
सेनाको टोलीले दरबार, खड्गकाली मन्दिर आसपास सरसफाइ गरेको गणका सेनानी कुसुम पहारीले बताए । गणतन्त्र दिवस विविध कार्यक्रमका साथ मनाउने निर्णय भए बमोजिम सेनाको टोलीले ऐतिहासिक स्थलमा सरसफाइ गरेको उनले बताए ।
तनहुँसुर सेन वंशीय राजाले राज्य सञ्चालन गरेको ठाउँ हो । तनहुँ जिल्लाको नाम तनहुँसुरवाट अप्रभंस भएर रहेको भन्ने किम्वदन्ती छ । पाल्पाका राजा मणिमुकुन्द सेनले आफ्ना जेठा छोरा भृङ्गीसेनलाई सन् १६१० मा तनहुँमा राज्य सञ्चालन गर्न पठाएको र उनी पछिका ८ सेनवंशी राजाले २३० वर्षतनहुँसुरबाट राज्य सञ्चालन गरेको इतिहास रहेको छ ।
