“ग्रामीण क्षेत्रका विद्यालयलाई विषयगत शिक्षक पाउँनै सकस छ” : प्रअ श्रेष्ठ

तनहुँ जिल्लाको दक्षिण भेग शिक्षाको हिसावले पछाडी परेकै क्षेत्र हो । यस क्षेत्रका विद्यार्थीलाई सामयिक रुपमा प्राविधिक, सीपयुक्त र व्यवहारिक शिक्षा प्रदानका लागि स्थानीय सरकारहरुले योजनावद्धढंगले नीति कार्यक्रम तयार गरी अगाडि बढ्दा पठनपाठनमा केही सहजता आएको ऋषिङ गाउँपालिकास्थित शिव सरस्वती माध्यमिक विद्यालयका प्रधानाध्यापक लिलकुमार श्रेष्ठ बताउँछन् ।

ऋषिङ गाउँपालिकाका ११ वटा माध्यमिक विद्यालयमध्ये यस विद्यालयमा प्राविधिक शिक्षा अन्तर्गत भेटेरिनरी विषयका पढाइ हुने गरेको छ। उक्त विषय पढाउनका लागि गाउँपालिकाले एक जना विषयविज्ञ डक्टर, एक सायक र एक कर्मचारी गरी ३ जना कर्मचारीको व्यवस्था गरेको छ । प्रधानाध्यापक श्रेष्ठका अनुसार भेटेरिनरी साइन्स पढाउनका लागि आवश्यक पर्ने स्रोतसाधन, औषधिलाई विद्यालयकै स्रोतसाधनबाट व्यवस्थापन गरिएको छ ।

गण्डकी प्रदेश अन्तर्गतको सिटिइभिटीबाट विद्यालयमा ‘सिक्दै कमाउँदै’ कार्यक्रम अन्तर्गत दुई लाख रुपैयाँ बजेट प्राप्त भएको र उक्त बजेटबाट विद्यालयमा अघिल्लो वर्ष कुखुरा पालन र यो वर्ष बाख्रा पालनको कार्यक्रम सञ्चालन गरिएको प्रधानाध्यापक श्रेष्ठले बताए ।

‘जेनतेन १२ पास गरेपछि विद्यार्थीहरु अध्ययन तथा रोजगारीका नामा विदेश पलायन हुने क्रम बढ्दै गएको छ । यस्ता कार्यलाई न्यूनिकरणका लागि सैद्धान्तिक ज्ञान भन्दा पनि व्यवहारीक शिक्षाको खाँचो देखिएको छ’, उनले भने, ‘पढिसकेपछि युवा जनशक्ति स्थानीय क्षेत्रमा खपत हुने खालको आधार खडा हुने खालको पठनपाठन अहिलेको आवश्यकता छ । २०२८ सालको शिक्षा ऐनलाई टेकेर काम भइरहेकाले शिक्षा क्षेत्रले अहिलेको परिवर्तनसंग मेल खाने जनशक्ति उत्पादन गर्न सकिरहेको छैन। हाम्रो तीनवटै तहका सरकारको पनि विद्यार्थीले पढेर सके हुन्छ भन्ने धाराण छ यसलाई पनि हटाउनु पर्छ ।’