भानुका १५ जना महिलाहरुलाई बाख्रा पालन तालिम
भानु : तनहुँको भानु नगरपालिका वडा नं. ५ सेपाबगैँचामा गरिबी निवारणका लागि सञ्चालित लघु उद्यम विकास कार्यक्रम अन्तर्गत तीन दिने बाख्रा पालन तथा खोर निर्माण सम्बन्धी तालिम सम्पन्न गरिएको छ ।
तालिममा वडा नं. ५ का १५ जना महिलाहरूले सहभागिता जनाएका थिए । गरिबी न्यूनीकरण, आम्दानी वृद्धि र महिलाको आर्थिक तथा सामाजिक सशक्तिकरण गर्नु तालिमको मुख्य उद्देश्य रहेको नगरपालिकाले जनाएको छ ।
तालिमका प्रमुख प्रशिक्षकका रूपमा भानु नगरपालिका पशु तथा मत्स्य विकास शाखाका प्रमुख डा. सुशिल ऐरीले सहभागीलाई बाख्रा पालनका लागि कृषकहरुले ध्यान दिनेपर्ने विषयमा आवश्यक ज्ञान तथा सीप प्रदान गरेका थिए ।
स्थानीयस्तरमै सीपमूलक तालिम प्रदान गरी महिला सशक्तिकरणमा टेवा पुर्याउने यस कार्यक्रमले सहभागीहरूमा आत्मनिर्भरताको भावना विकास गर्न मद्दत पुगेको विश्वास आयोजकले लिएको छ ।
स्थानीय १५ जना महिलाहरुको सहभागीता रहेको तालिममा कार्यक्रमको मुख्य उद्देश्य गरिवि निवारण, आय आर्जनमा टेवा पुर्याउनुका साथै महिलालाई थप शसक्तिकरण बनाउने विषयमा सहजिकरण गरिएको थियो ।
तालिममा नगरपालिकाको पशु तथा मत्स्य विकास शाखाका अमित ढुंगान, धनराज कुमाल, सन्दिप ढकालले सहजिकरण गरेका थिए ।
यस्तै, तालिमका सहभागिहरुलाई नगरपालिकाका वरिष्ठ लेखा अधिकृत नवराज लौडारी र प्रशासकीय अधिकृत तथा मेडप फोकल पर्सन कृपाहरि लौडारीले प्रमाणपत्र वितरण गरेका थिए ।
