बन्दीपुरको नाहालाका कृषकको धान खेतीमा ब्लाष्ट रोग देखियो
बन्दीपुर : तनहुँको बन्दीपुर गाउँपालिका–१ नाहालाका कृषकको धान खेतमा ब्लाष्ट रोग देखिएको छ । कृषकको धान खेतीमा ब्लाष्ट रोग देखिएपछि गाउँपालिका र कृषि विकास शाखाले किसानलाई समयमै सतर्क रहन आग्रह गर्दै धान बाली वा अन्य कृषि सम्बन्धी समस्या देखिएमा तुरुन्तै शाखासँग सम्पर्क गर्न अनुरोध गरेको छ ।
कृषि विज्ञका अनुसार ब्लाष्ट रोग धानमा देखिने प्रमुख ढुसीजन्य रोग हो, जसलाई पाइरिकुलारिया ओराइजे (धानको डढेलो रोग उत्पन्न गर्ने ढुसी÷फफूँद) नामक ढुसीले निम्त्याउने गर्दछ । यसले बेर्ना मर्नु, पातमा सेतो टिका सहितका खैरो दाग देखिनु, बाला सुक्नुजस्ता समस्या ल्याउँछ । रोगलाई अनुकूल वातावरण भेटिएमा ढुसीले छिट्टै फैलने भएकाले ठूलो क्षति हुने खतरा हुन्छ ।
बीउ उपचार नगरी प्रयोग गर्नु, एउटै खेतमा लगातार वर्षे धान लगाइराख्नु, पराल र नलको व्यवस्थापन नगर्नु, अत्यधिक यूरिया प्रयोग गर्नु तथा व्यवस्थित सिँचाइको अभाव प्रमुख कारणका रूपमा देखिएका कृषि विज्ञले बताएका छन् ।
यस्तै, धानको पातमा स–साना सेता टिका सहितका लाम्चा खैरा दाग देखिनु, बाला मुन्तिर डाँठ वरिपरि खैरो वलय देखिनु र अन्ततः बाला सुक्नु यसको मुख्य लक्षण हुन् ।
यो रोग नदेखिएको खेतका बीउ मात्र प्रयोग गर्ने, प्रतिकिलो बीउलाई २ ग्राम कार्बेन्डाजिममा १२ घण्टा भिजाएर उपचार गर्ने, पर्याप्त पानी जमाएर खेत व्यवस्थापन गर्ने, रोग प्रतिरोधी धानका जात (खुमल–४, सावित्री, राधा–४, चन्दनाथ–१, चन्दनाथ–२) प्रयोग गर्ने, बेर्ना बाक्लो नराख्ने, २०÷२० से.मी. दूरीमा रोप्ने, सन्तुलित मल प्रयोग गर्ने र नाइट्रोजन मल एकै पटक नहाल्ने, रोग लागेपछि गर्ने व्यवस्थापन, निरोगी बीउ मात्र प्रयोग गर्ने र रोगग्रस्त खेतको बीउ प्रयोग नगर्ने, बाली चक्र अपनाउने र खेत सफा राख्ने, आवश्यक परेमा ट्राइसाइक्लाजोल, कासुगामाइसिन, हेक्साकोनाजोल, क्रेसोक्सिम मेथाइल जस्ता औषधि छर्नुपर्ने कृषि विज्ञहरुले बताएका छन् ।
कृषि विकास शाखाले किसानलाई समयमा रोग नियन्त्रण नगरेमा उत्पादनमा ठूलो क्षति हुने चेतावनी दिँदै रोग देखिएलगत्तै शाखासँग सम्पर्क राख्न आग्रह गरेको छ ।
