स्थानीय निर्वाचनले तनहुँमा चहलपहल बढ्यो, उम्मेदवार घरदैलो र चुनावी सभामा केन्द्रित
भञ्ज्याङ समाचारदाता/दमौली

आसन्न स्थानीय निर्वाचनको मिति नजिकिएसंगै तनहुँमा चुनावी गतिविधिले चहलपहल बढाएको छ । वैशाखको गर्मीसंगै चुनावी माहोलले तनहुँको जनजीवनलाई पनि चहलपहल बनाउँदै तताएको छ । जिल्लाको चार नगरपालिका र छ गाउँपालिकाको प्रमुख/अध्यक्ष, उपप्रमुख/उपाध्यक्ष, वडाध्यक्ष तथा सदस्य पद दावागर्ने दलका उम्मेदवार तथा स्वतन्त्र उम्मेदवारहरु अहिले चुनावी गतिविधिमा होमिएका छन् ।
तनहुँको भानु, व्यास, शुक्लागण्डकी, भिमाद नगरपालिका, देवघाट, आँवुखैरेनी, बन्दिपुर, म्याग्दे, घिरिङ र ऋषिङ गाउँपालिकाको ४४५ पदका राष्ट्रिय मान्यता प्राप्त छ, स्थानीय १७ गरी २३ राजनीतिक दल तथा स्वतन्त्र रुपमा उम्मेदवारी दर्ता गराउने गरी १ हजार ६३६ जना उम्मेदवारहरु अहिले चुनावी मैदानमा उत्रिएका छन् । तनहुँको १० वटै पालिका यतिबेला निर्वाचनमय भएका छन् । दलबलसहित यहाँका वडादेखि पालिकाका उम्मेदवारहरु खेतबारी, गठालासम्म पुगेर मत माग्न सक्रिय छन् ।
जिल्लामा क्रियाशील प्रमुखदेखि सबैजसो पार्टीका उम्मेदवार आ-आफ्नो पक्षमा जनमत बटुल्न प्रतिबद्धतापत्रदेखि विगतमा गरेका कामको दस्तावेजसहित घरदैलो अभियानमा जुटेका छन् । उम्मेदवारसँगै केन्द्रीय नेतासमेत घरदैलो अभियानमा मत माग्दै हिँडेका छन् ।
स्थानीय तहको निर्वाचन पनि हुने प्रदेश र प्रतिनिधिसभाको निर्वाचनलाई ध्यानमा राखेर नेपाली कांग्रेस, नेकपा (एमाले), नेकपा (माओवादी केन्द्र), नेकपा (एकीकृत समाजवादी), राप्रपा, राप्रपा नेपाल, जनमोर्चा, विवेकशिल साँझ लगायत दलका केन्द्रीयस्तरका नेता समेत यतिबेला घरदैलो गरिरहेका छन् ।
प्रतिनिधिसभा सदस्यहरु, राष्ट्रिय सभा सदस्यहरु तथा विभिन्न दलका केन्द्रियस्तरका नेताहरु पालिकाको निर्वाचनका माध्यमबाट नागरिकको घरदैलोमा पुगेका छन् । नेताहरु पार्टी गतिविधि र चुनावका बेला नै नागरिकसित भेटघाटको अवसर मिल्ने भएको राष्ट्रिय सभा सदस्य भगवती न्यौपानले बताइन् ।
आफ्नो गृहजिल्लाको भानु नगरपालिकामा नेकपा एमाले र जोशी समुहका उम्मेदवारहरुको पक्षमा मत माग्दै चुनावी अभियानमा उत्रिएकी सांसद न्यौपानेले अहिले मतदाताले युवा रोजगारीको विषयलाई प्राथमिकताका साथ उठान गरिरहेको बताइन् । युवाहरुको आवश्यकता र मागलाई सम्बोधन गर्ने गरी अहिले आफ्नो पार्टीले चुनावी प्रतिवद्धता र ती प्रतिवद्धता कार्यान्वयन गर्ने गरी योजनाका साथ अगाडि बढेको उनले बताइन् ।
यस्तै, नेपाली कांग्रेसका केन्द्रीय सदस्य शंकर भण्डारी, राष्ट्रिय सभा सदस्य प्रकाश पन्थ पनि अहिले जिल्लामा पार्टीको चुनावी गतिविधिमा सक्रिय छन् । जिल्लाका १० वटै पालिकामा नेपाली कांग्रेसका उम्मेदवारहरु तथा आंशिक रुपमा गठबन्धन भएका पालिकामा गठबन्धन दलका उम्मेदवारहरु संयुक्त रुपमा चुनावी गतिविधिमा सहभागि भएका छन् ।
अघिल्लो साता उम्मेदवारी मनोनयन दर्ता पश्चात शनिबार निर्वाचन अधिकृतको कार्यालयबाट चुनाव चिन्ह पाएसंगै तनहुँमा चुनावी सरगर्मी हृवात्तै बढेको छ । गाउँ शहर जताततै निर्वाचनको माहोल देखिएको छ । उम्मेद्वारहरुले भोट माग्न घरदैलो गरिरहेका छन् । सवारी साधानमा स्पिकर, पार्टीका चुनाव चिन्ह अंकित झण्डा तथा पार्टीको एजेण्डा सहितको चुनावी गित घन्काउदै मतदाता रिझाउनमा दलहरु गाउँ पसेका छन् ।
गाउँदेखि बजारसम्म मतदाताले नमस्कारको अभिवादन पाईरहेका छन् । कोही उम्मेद्वार ढोग्दै आर्शिवाद मागिरहेका तस्विरहरु पनि सामाजिक सञ्जालमा देखिन थालेका छन् । घरमा मात्रै नभएर खेत बारीमा काम गरिरहेका मतदातालाई पनि भेट्नलाई उम्मेद्वार पुगेका छन् । बाटोमा भारी बोक्दै गरेका भरिया, गोठाला तथा घर कुरेर बसेका वृद्धवृद्धालाई भेटेर उम्मेद्वारले आफ्नो पक्षमा मतदान गर्न आग्रह गर्न थालेका छन् ।
यस्तै, नेपाली कांग्रेसका वरिष्ठ नेता रामचन्द्र पौडेलको जन्मगाउँ बाहुनपोखरामा नेकपा एमाले-जोशी समूहले घरदैलो गरेको छ । व्यास नगरपालिका-८ बाहुनपोखरामा एमाले-जोशी समूहबाट मेयरका उम्मेदवार दीपकराज जोशी र उपमेयरका उम्मेदवार बसुन्धरा र्घर्तीले सोमबार घरदैलो गरेका हुन् । उम्मेदवारहरुले उक्त वडाका बाहुनपोखरा, गाडापानी, रिस्ती, पुलिमराङ लगायतका ठाउँमा जनतासँग भेटघाट गर्दै मत दिन आग्रह गरेका थिए ।
नेकपा एमालेको तर्फबाट शुक्लागण्डकी नगरपालिकाको मेयरमा उम्मेदवारी दिएका मुक्ति तिम्लिसिना र उमपेयरकी उम्मेद्वार फुलमाया वाग्ले मतादाता भेट्दै गाउँगाउँ पुग्न थालेका छन् । जनताको मागलाई सम्बोधन गर्दै मेयरका उम्मेद्वार तिम्लिसिनाले शुक्लागण्डकीमा अब नेकपा एमालेले जितेपछि विकासले फड्को मार्ने बताए । उनले रित्तिएको गाउँलाई शहर गएकाहरु र्फकने गरेर बिकास गर्ने प्रतिवद्धता जनाएका छन् ।
सामुदायिक विद्यालयको शैक्षिक गुणस्तर सुधार्ने, ग्रामीण सडक स्तरोन्नती गर्ने, खानेपानीका समस्यालाई समाधान गर्दै पर्यटकीय सम्भावना बोकेका स्थानहरुको पहिचान गर्ने उनले उद्घोष गरेका छन् । उपमेयरकी उम्मेद्वार वाग्लेले आमा समुह, युवा क्बललाई उत्साहजनक सहयोग गर्ने बताईन ।
ग्रामीण भेगका किसानलाई सहयोग गर्ने उनको भनाई छ । घरदैलो कार्यक्रममा उम्मेद्वारसँगै शुक्लागण्डकी नगरपालिकाका प्रभावशाली एमाले नेताहरु समेत सहभागी थिए । एमालेका उम्मेद्वारहरुले सोमबार फिरफिरे क्षेत्रका मतदाता भेट्ने तथा घारी, लिलाचोक, जसपुर, लामागाउँ, घरेडीका जनतासँग साक्षत्कार गरेको छ ।
त्यस्तै, गठबन्धन पश्चात् तनहुँको देवघाटमा नेपाली कांग्रेस र नेकपा माओवादी केन्द्र घरदैलो कार्यक्रममा व्यस्त छन् । आइतबारबाट सुरू भएको घरदैलो कार्यक्रम साँढेबगरबाट सुरू हुँदै क्वादी, बगन्दी, साउनेसम्म घरदैलो कार्यक्रम गरेको थियो । सोमबार देवपुर नयाँवस्ती वरपर घरदैलो कार्यक्रम गरिएको वडा नम्बर ५ का वडाध्यक्ष उम्मेदवार पुर्ण बहादुर कुवंरले बताए ।
जिल्ला निर्वाचन कार्यालय तनहुँका अनुसार १० स्थानीय तहको ८५ वडामा १ हजार ६३६ उम्मेद्वारले प्रतिष्पर्धामा उत्रिएका छन् । कार्यालयका प्रमुख हरि ढकालका अनुसार चार नगरपालिकाको मेयरमा २८ जना र उपमेयरमा २१ जना चुनावी मैदानमा होमिएका छन् । छ गाउँपालिकाको अध्यक्षमा ३२ र उपाध्यक्षमा ३१ जनाले प्रतिष्पर्धा गर्नेछन् ।
८५ वडाको वडाध्यक्षमा ३६० जनाले प्रतिष्पर्धा गर्दैछन् । १७० खुला वडा सदस्य निर्वाचित हुनेमा ६०३ जनाको उम्मेद्वारी परेको छ । महिला वडा सदस्यमा २८६ र दलित महिला सदस्यमा २७५ जनाको उम्मेद्वारी परेको छ । उम्मेद्वारी दिएका मध्य ८० जना स्वतन्त्र उम्मेद्वार छन् ।
अघिल्लो पटकको स्थानीय निर्वाचनमा जिल्लामा १ हजार ५८२ जनाले चुनावी प्रतिष्पर्धा गरेका थिए । जिल्लामा २ लाख ४४ हजार ३४० मतदाताले नगरपालिका, गााउँपालिका र वडा हाँक्ने नेतृत्व चयन गर्दैछन् ।