मुस्ताङको पहिचान बोकेको रेडियो भवन
मुस्ताङ ब्रोड्कास्टिङ्ग कम्यूनिटी मुस्ताङको सञ्चार इतिहासको एउटा प्रेरणादायी अध्याय हो । स्थानीय सञ्चारको पहुँच विस्तार गर्ने उद्देश्यका साथ स्थानीय कुलबहादुर थकाली र केदारसिंह थापाको पहलमा स्थापना गरिएको यो सामुदायिक रेडियो केन्द्रलाई सन् २०१३ मा दक्षिण कोरियाको KOICA/MBC को सहयोगमा स्थानीय ढुङ्गा प्रयोग गरी आधुनिक स्वरूप प्रदान गरिएको थियो ।
मौलिक हिमाली वास्तुकला, स्थानीय ढुङ्गाबाट बनेको आकर्षक संरचना र अत्याधुनिक प्रसारण स्टुडियोका कारण यो रेडियो भवनलाई एक समय ‘विश्वकै सुन्दर रेडियो स्टेशन’ मध्ये एकका रूपमा समेत चर्चा गरिन्थ्यो। सञ्चार पूर्वाधार र स्थानीय संस्कृतिको उत्कृष्ट समन्वयको नमुना बनेको यो केन्द्र मुस्ताङको गौरवका रूपमा परिचित रह्यो ।
यद्यपि आर्थिक तथा सञ्चालनसम्बन्धी चुनौतीका कारण हाल यसको प्रसारण सेवा बन्द भइसकेको छ । तर, यो भवन आज पनि सामुदायिक सञ्चार, स्थानीय पहल र ठूलो सपनाको सजीव प्रतीकका रूपमा उभिएको छ ।
समुद्री सतहबाट करिब २,८०० मिटर उचाइमा घरपझोङ गाउँपालिका–४ मा अवस्थित यो रेडियो केन्द्र केवल एउटा भवन मात्र होइन, मुस्ताङका नागरिकको आवाज, पहिचान र सूचना पहुँच विस्तार गर्ने अभियानको ऐतिहासिक स्मारक पनि हो ।
प्रसारण सेवा बन्द भएपछि संरक्षणको अभावमा भवन जीर्ण बन्दै गएको थियो । हाल भने घरपझोङ गाउँपालिकाले यसको मर्मत–सम्भार गरी सीसी क्यामेरा जडानसहित संरक्षणको व्यवस्था गरेको छ, जसले यस ऐतिहासिक सम्पदालाई जोगाउने प्रयासलाई थप मजबुत बनाएको छ । तस्बिर : विष्णु पौडेल ‘निरिस’/भञ्ज्याङ
