कांग्रेस तनहुँको स्पष्टीकरण
दमौली : नेपाली कांग्रेसको १५औँ महाधिवेशनअन्तर्गत तनहुँका वडा अधिवेशनमा मतदान अधिकृतका रूपमा खटिएका शिक्षकबाट सहयोग लिएको विषयलाई लिएर विभिन्न सञ्चारमाध्यममा प्रकाशित समाचारप्रति नेपाली कांग्रेस तनहुँले ध्यानाकर्षण जनाएको छ ।
नेपाली कांग्रेस तनहुँ जिल्ला कार्यसमितिले मंगलबार प्रेस विज्ञप्ति जारी गर्दै शिक्षकहरूले मतदान अधिकृतका रूपमा सहयोग गरेको विषयलाई ‘शिक्षकहरूले राजनीति गरे’ भन्ने भाष्यमा प्रचार गरिएको भन्दै आपत्ति जनाएको हो ।
कांग्रेस तनहुँका सभापति जितप्रकाश आलेद्वारा जारी विज्ञप्तिमा नेपालको संविधानले प्रत्येक नागरिकलाई आफू संलग्न पेशा, व्यवसाय वा सेवाका क्षेत्रमा आफ्नो सीप, दक्षता, ज्ञान र अनुभवको उपयोग गर्ने अधिकार सुनिश्चित गरेको उल्लेख गरिएको छ । शिक्षक, प्राध्यापक, कर्मचारी वा अन्य पेशागत क्षेत्रमा संलग्न हुँदैमा आफ्नो पेशागत ज्ञान, सीप र दक्षताको उपयोग गर्न नपाउने अर्थ नलाग्ने कांग्रेसको भनाइ छ ।
कांग्रेसले पार्टी विधान तथा प्रचलित कानुनी व्यवस्थाअनुसार विभिन्न तहका अधिवेशन निर्धारित प्रक्रियाबाट सम्पन्न गर्नुपर्ने भन्दै अधिवेशनलाई व्यवस्थित, निष्पक्ष र विश्वसनीय बनाउन आवश्यक प्राविधिक तथा व्यवस्थापकीय दक्षता भएका जनशक्तिको सहयोग लिनु स्वाभाविक र आवश्यक विषय भएको जनाएको छ ।
कुनै शिक्षक वा अन्य पेशागत व्यक्तिले आफ्नो पेशागत दक्षताका आधारमा अधिवेशनमा सहयोग गर्नु मात्रलाई राजनीतिक गतिविधिमा संलग्न भएको अर्थमा बुझ्न उपयुक्त नहुने विज्ञप्तिमा उल्लेख छ । सम्बन्धित कार्यालय वा संस्थाको नियमित काममा बाधा नपर्ने गरी तथा प्रचलित कानुन र सम्बन्धित सेवाका सर्तहरूको अधीनमा रहेर कर्मचारी, शिक्षक, प्राध्यापक वा अन्य पेशागत जनशक्तिबाट उनीहरूको सीप, दक्षता र अनुभवअनुसार सेवा लिनु कानुनसम्मत र स्वाभाविक प्रक्रिया भएको कांग्रेस तनहुँले स्पष्ट पारेको छ ।
कांग्रेस तनहुँले सामान्य तथा पेशागत प्रकृतिको सहयोगलाई अतिरञ्जित गरी कुनै व्यक्ति वा पेशागत समुदायलाई ‘राजनीति गरेको’ भन्ने अर्थ लाग्ने गरी प्रचार–प्रसार नगर्न सञ्चारमाध्यमसहित सम्बन्धित सबैमा आग्रह गरेको छ । विषयको वास्तविकता र कानुनी पक्ष बुझेर मात्र समाचार सम्प्रेषण गर्न पनि कांग्रेसले अनुरोध गरेको छ ।
