गण्डकीमा बाढीपहिरोको कहर : २१ जनाको मृत्यु, विपद् कोषमा १० करोड रुपैयाँ विनियोजन

पोखरा : असोज ९ देखि ११ गतेसम्म परेको अविरल वर्षासँगै आएको बाढी, पहिरो र डुबानका कारण गण्डकी प्रदेशमा ठूलो जनधनको क्षति भएको छ । विपद्मा परी हालसम्म २१ जनाको मृत्यु भएको तथा केही व्यक्ति अझै बेपत्ता रहेको प्रदेश सरकारले जनाएको छ ।

विपद्मा परेका नागरिकको उद्धार, खोजी, उपचार, राहत तथा पुनर्स्थापना कार्यलाई प्रभावकारी बनाउन प्रदेश विपद् व्यवस्थापन कार्यकारी समितिको बैठकले तत्कालीन तथा दीर्घकालीन राहत र पुनर्निर्माणका कार्यक्रम अघि बढाउने निर्णय गरेको छ ।

गण्डकी प्रदेशका अनुसार उद्धार तथा राहत कार्यलाई तीव्र बनाउन नेपाली सेनाको समन्वयमा तीन वटा हेलिकप्टर परिचालन गरिएको छ । आइतबार र सोमबार गरी हेलिकप्टरमार्फत १४३ जनालाई सुरक्षित स्थानमा स्थानान्तरण गरिएको छ । घाइतेको उपचार तथा बेपत्ताको खोजी कार्यसमेत जारी रहेको जनाइएको छ ।

बाढी र पहिरोका कारण प्रदेशभरका ११ वटा झोलुङ्गे पुल, छ वटा पक्की पुल र ४३ वटा सडकखण्ड अवरुद्ध भएका छन्। अवरुद्ध सडक तत्काल सञ्चालनमा ल्याउन जिल्लास्थित पूर्वाधार विकास कार्यालयलाई परिचालन गरी काम सुरु गरिएको प्रदेश सरकारले जनाएको छ ।

मध्यपहाडी लोकमार्ग, कालीगण्डकी करिडोर, बेनी–जोमसोम–कोरोला तथा बेँसीसहर–मनाङ सडक सञ्चालनका लागि संघीय सरकारसँग आवश्यक समन्वय गरिएको छ । चाडपर्वको समयमा सडक सम्पर्क विच्छेद हुँदा नागरिकले थप समस्या भोग्नुपर्ने अवस्थालाई ध्यानमा राख्दै वैकल्पिक मार्ग सञ्चालनमा समेत जोड दिइएको छ ।

मनाङमा चिकित्सक र औषधि पठाइयो

बाढीपहिरोबाट प्रभावित मनाङमा आवश्यक औषधिसहित दुई जना चिकित्सक र एक जना नर्सलाई हेलिकप्टरमार्फत पठाइएको प्रदेश सरकारले जनाएको छ । प्रदेश मातहतका अस्पताललाई आकस्मिक स्वास्थ्य सेवा निरन्तर सञ्चालन गर्न तथा सम्भावित विपद्को अवस्थालाई मध्यनजर गर्दै पूर्ण तयारीमा रहन निर्देशन दिइएको छ ।

मनाङमा बाढीका कारण सडक, पुल तथा विद्युत् र सञ्चार संरचनामा समेत क्षति पुगेको छ। यसअघि प्राप्त विवरणमा मनाङका विभिन्न क्षेत्रमा घर, काठे पुल तथा कजवेमा क्षति पुगेको र कतिपय स्थान सडक सम्पर्कबाट विच्छेद भएको जनाइएको थियो ।

तीन जिल्लामा राहत सामग्री

बाढीपहिरोका कारण विस्थापित नागरिकलाई तत्काल राहत तथा सुरक्षित आवासको व्यवस्था गर्न जिल्ला तथा स्थानीय विपद् व्यवस्थापन समितिको समन्वयमा नेपाली सेना, नेपाल प्रहरी र सशस्त्र प्रहरी परिचालन गरिएको छ ।

प्रदेश सरकारले आवश्यकताका आधारमा बागलुङ, मनाङ र पर्वतमा त्रिपाल, टेन्ट तथा स्वास्थ्य सामग्री पठाएको जनाएको छ । बागलुङमा पछिल्लो विवरणअनुसार पहिरोमा परी १० जनाको मृत्यु र एक जना बेपत्ता भएको जिल्ला प्रहरीको जानकारी सार्वजनिक भएको छ ।

११ जिल्लाको विपद् कोषमा कम्तीमा १० लाख

विपद् व्यवस्थापनका लागि प्रदेशका ११ वटै जिल्ला विपद् व्यवस्थापन समितिको कोषमा न्यूनतम १० लाख रुपैयाँ नघट्ने गरी बजेट व्यवस्था गरिएको छ । प्रदेश विपद् व्यवस्थापन कोषमा भने १० करोड रुपैयाँ विनियोजन गरिएको प्रदेश सरकारले जनाएको छ । तत्काल आवश्यक पर्ने खर्च प्रदेश विपद् व्यवस्थापन कोषबाट गर्न र कोषको रकम खर्च भएपछि आवश्यकताअनुसार पुनः रकम माग गरी व्यवस्थापन गर्न सम्बन्धित निकायलाई निर्देशन दिइएको छ ।

क्षतिग्रस्त घर पुनर्निर्माणमा साझेदारी

बाढीपहिरोका कारण घरबारविहीन भएका नागरिकले निजी आवास निर्माणका लागि सम्बन्धित स्थानीय विपद् व्यवस्थापन समितिमा जानकारी गराउनुपर्नेछ ।

स्थानीय तहबाट प्राप्त विवरणका आधारमा जिल्ला विपद् व्यवस्थापन समितिको सिफारिसमा संघ, प्रदेश र स्थानीय तहको साझेदारीमा रहेको निजी आवास निर्माणसम्बन्धी संयुक्त कोषबाट तोकिएको मापदण्डअनुसार घर निर्माणका लागि रकम निकासा गरिने प्रदेश सरकारले जनाएको छ ।

प्रदेश सरकारले जिल्लास्थित पूर्वाधार, खानेपानी तथा सरसफाइ, सिँचाइ, स्वास्थ्य, अस्पताल, कृषि तथा भेटेरिनरीलगायत कार्यालयलाई आफ्नो कार्यक्षेत्रमा विपद्पछि तत्काल गर्नुपर्ने काम अघि बढाउन निर्देशन दिएको छ ।

लगातारको वर्षापछि गण्डकीका बागलुङ, म्याग्दी, पर्वत र मनाङलगायत जिल्लामा ठूलो क्षति भएको छ । प्रारम्भिक विवरणमा घर, सडक, पुल, विद्युत् तथा सञ्चार संरचनामा समेत क्षति पुगेको जनाइएको छ ।

प्रदेश सरकारले विपद्को कठिन अवस्थामा नागरिकको जीवन रक्षा, उद्धार, उपचार, राहत तथा पुनस्र्थापनालाई प्राथमिकतामा राख्दै क्षतिग्रस्त सडक तथा भौतिक पूर्वाधार शीघ्र सञ्चालन, विस्थापितको पुनस्र्थापना र क्षतिग्रस्त संरचनाको पुनर्निर्माणमा संघ, स्थानीय तह, सुरक्षा निकाय तथा सम्बन्धित निकायसँग समन्वय गर्ने जनाएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर