दुइ चरणमा तनहुँमा खोप अभियान, ९४ वटा खोप केन्द्रबाट १५ हजार बढी नागरिकलाई खोप लगाउने लक्ष्य

तनहुँमा आज आइतबारदेखि कोभिड-१९ विरुद्धको दोस्रो चरणको खोप अभियान सुरु गरिने भएको छ । जिल्ला स्वास्थ्य कार्यालयले फागुन २३ गतेबाट २७ गतेसम्म र २८ गतेबाट चैत २ गतेसम्म गरी दुइ चरणमा खोप अभियान सञ्चालन गर्ने तयारी गरेको हो । कार्यालयले शनिबार पत्रकारहरुसंग अभिमुखिकरण कार्यक्रम गरी प्रमुख शंकरबाबु अधिकारीले कोभिड-१९ विरुद्धको खोप अभियान दुइ चरणमा गरी सञ्चालनको तयारी गरिएको जानकारी गराए । प्रमुख अधिकारीले तनहुँमा दोस्रो चरणको खोप अभियान अन्तर्गत दश वटा स्थानीय तहका ६५ वर्ष उमेर समूहका करिब १५ हजार भन्दा बढी ज्येष्ठ नागरिकहरुलाई खोप लगाउने लक्ष्य राखिएको बताए ।

कार्यालयले फागुन २३ देखि २७ गतेसम्म व्यास नगरपालिका, भानु नगरपालिका, बन्दिपुर गाउँपालिका, आँबुखैरेनी गाउँपालिका र देवघाट गाउँपालिकामा खोप कार्यक्रम सञ्चालन गरिने छ । फागुन २८ देखि चैत्र २ गतेसम्म शुक्लागण्डकी नगरपालिका, भिमाद नगरपालिका ऋषिङ गाउँपालिका, घिरिङ गाउँपालिका र म्याग्दे गाउँपालिकामा लगाइने कार्यक्रम तय गरिएको प्रमुख अधिकारीले बताए ।

खोप अभियानका लागि स्वास्थ्य कार्यालयले २६६ जना स्वास्थ्यकर्मी, ४२५ जना स्वयंसेवकहरुलाई तयार गरिएको प्रमुख अधिकारीले जानकारी गराए । यस्तै, आकस्मिकताका आधारमा स्वास्थ्यकर्मी परिचालन गर्नका लागि विशेष इएफआई व्यवस्थापन टोली समेत गठन गरिएको स्वास्थ्य कार्यालय तनहुँका फोकल पर्सन विरेन्द्र चौधरीले जानकारी गराए ।

तनहुँका ८५ वटा वडाका ९४ वटा स्वास्थ्य कार्यालयबाट लगाइने कोभिडशिल्ड खोप उपलब्धताको आधारमा ५५ वर्ष माथिका उमेर समुहका शिक्षकहरु र सवारीचालक तथा सहचालकहरुलाई समेत लगाइने चौधरीले बताए ।

यस्तै, विभिन्न चरणको परिक्षण पश्चात खोप स्वीकृत भएर समुदायमा जान लागेकाले ढुक्क भएर खोप अभियानमा सरिक हुन स्वास्थ्य प्रमुख अधिकारीले आग्रह गरेका छन् । हालम्म कुनै पनि गम्भिर समस्या उत्पन्न नभएकाले यसबाट सबैले पूर्ण सुरक्षाको प्रत्याभूति गर्नुपर्ने अधिकारीको भनाई थियो ।

कोभिड-१९ को प्रभाव र संक्रमणको बढी जोखिममा रहेका उमेर समूहका आधारमा खोपको प्रथामिकता निर्धारण गरिएको उनले जानकारी दिए । रोग लाग्ने दर र रोगबाट मृत्युदर घटाउने उद्देश्यले खोप अभियान सञ्चालन गरिएकाले यस अभियानलाई सबैले आ-आफ्नो ठाँउबाट सघाउनुपर्नेमा अधिकारीले जोड दिएका थिए ।

कोभिडशिल्ड गम्भिर प्रकृतिका एलर्जी भएको खण्डमा, गर्भवती महिला र कोभिडको सक्रिय संक्रमित भएको अवस्थामा र प्लाजमा थेरापीको करिब तीन महिना सम्मको अवस्था बाहेक अन्य अवस्थामा लगाउदा यसको ८१ प्रतिशतसम्म प्रभावकारिता रहने विश्वास गर्न सकिने स्वास्थ्य कार्यालयले जनाएको छ । तनहुँमा पहिलो चरणको खोप अभियानबाट ५ हजार जना लाभन्वित भएका थिए भने दोस्रो चरणमा दशवटै पालिकाका १५ हजार बढी नागरिक लाभान्वित हुने लक्ष्य लिइएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर