आँवुखैरेनीको गिरनचौर र हिलेखर्कलाई नमूना पर्यटकीय गाउँ बनाइने

तनहुँको आँबुखैरेनी गाउँपालिकाले दुइ वडामा पर्ने गाउँलाई पर्यटकीय गन्तव्य बनाउने भएको छ । गाउँपालिका अन्तर्गत वडा नम्बर १ को गिरनचौर र वडा नम्बर ६ को हिलेखर्कलाई नमूना पर्यटकीय गाउँ बनाउन लागेको हो ।

यसका लागि गाउँपालिकाले दुवै वडामा ३०/३० लाख रुपैयाँ बजेट विनियोजन गरिसकेको गाउँपालिका अध्यक्ष शुक्र चुमानले बताए । उक्त क्षेत्रमा रहेका घरबासलाई व्यवस्थितब गरी घुमाउने घरको संरक्षण एवं संवर्द्धन गरी पर्यटकलाई थप आकर्षण गर्ने लक्ष्य राखिएको छ ।

पृथ्वीराजमार्ग खण्डमा हुनसक्ने दुर्घटनालाई लक्षित गरी हाइवे इमर्जेन्सी अस्पताल एण्ड ट्रमा सेन्टर निर्माण गर्ने योजना बनाएको छ । आँबुखैरेनी गाउँपालिका-१ सत्रसयमा रहेको सार्वजनिक जग्गामध्ये करिब २० रोपनी जग्गा सदुपयोग गरी एक सय शय्या क्षमताको अस्पताल बनाउन सम्भाव्यता अध्ययन गर्न लागेको हो ।

प्रदेश र संघीय सरकारका स्वास्थ्य मन्त्रालयमा अस्पताल निर्माणको लागि उक्त स्थान उत्तम रहेको भनी गाउँपालिका कार्यालयले सिफारिस गरेको अध्यक्ष चुमानले जानकारी दिए । सम्भाव्यता अध्ययनका लागि प्रदेश सरकारले केही बजेट विनियोजन गरेकाले छिट्टै अध्ययन गरी उचित स्थान ठहरिए प्रक्रिया अघि बढाइने उनले बताए ।

राजमार्गसँगै जोडिएको उक्त स्थानमा करिब एक सय रोपनी जग्गा सार्वजनिक रहेकाले गाउँपालिकाले जग्गा संरक्षणका साथै सेवा प्रदान गर्न अस्पताल निर्माण गर्ने अवधारण अघि बढाएको हो । गाउँपालिकाको वडा नं २ र ४ को सिमनामा पर्ने ऐनापहरामा ऐनापार्क बनाउन लागेको छ । पर्यटन प्रवर्द्धन गर्ने उद्देश्यले चालु आर्थिक वर्षमा रु एक करोड ४० लाख विनियोजन गरिसकेको सो गाउँपालिका कार्यालयले जनाएको छ ।

बहुवर्षीय योजना अन्तर्गत आफ्नै स्रोतमा डिपिआर गरी प्रक्रिया अघि बढाइएको गाउँपालिकाका प्रमुख प्रशासकीय अधिकृत विष्णुप्रसाद शर्माले जानकारी दिए । कुल रु पाँच करोड लाग्ने अनुमानअनुरुप गौरवको आयोजनामा राखेर काम गर्न लागेको गाउँपालिका कार्यालयले जनाएको छ । पृथ्वीराजमार्ग भएर दैनिक सयौँ सवारीसाधान गुड्ने हुँदा पर्यटकलाई आकर्षण गर्न सकेको अवस्थामा आयआर्जन गर्न सकिने प्रचुर सम्भावना देखिएको उनले बताए ।

यस्तै, गाउँपालिका-५ मा पर्ने छिम्केश्वरी पर्यटन मार्ग कालोपत्र गर्नका लागि तीन तहकै सरकारले लगानी गरेका छन् । गण्डकी प्रदेशको ४७ करोड, संघीय सरकारको समपुरक रु छ करोड र आँबुखैरेनी गाउँपालिकाको रु एक करोड गरी रु ५४ करोड लगानी हुने गाउँपालिका अध्यक्ष चुमानले बताए ।

समुद्री सतहबाट दुइ हजार १३४ मिटर उचाइमा रहेको धार्मिक पर्यटकीयस्थल छिम्केश्वरी मन्दिर जाने मार्ग कालोपत्र गर्न लागिएको हो । सडक कालोपत्रेको ठेक्का शर्मा काष्ठमण्डप निर्माण सेवा पाएको छ ।

छिम्केश्वरी मन्दिर धार्मिक आस्थाको केन्द्र रहनुका साथै त्यहाँबाट देखिने प्राकृतिक दृश्य हेर्न पर्यटक आउने गरेका छन् । यहाँबाट हिमशृङ्खला, हरियाली डाँडाकाँडा तथा समथर फाँट सजिलै देख्न सकिन्छ । जिल्लाको आँबु, भाँगे, छिम्केश्वरी, हिलेखर्क, बाहुन भञ्ज्याङ, छिम्केश्वरी सडक पर्यटक मार्गको नामले परिचित हुँदै आएको अध्यक्ष चुमानले बताए ।

आँबुखैरेनी-३ गाउँपालिका चोकदेखि छिम्केश्वरी डाँडासम्म करिब १६ किलोमिटरमध्ये रु ५० लाखको लागतमा तीन किमी सडक स्तरोन्नती गरिएको गाउँपालिकाका प्रमुख प्रशासकीय अधिकृत शर्माले बताए । दुइ वर्षअघि निर्माण सम्पन्न भइसक्नुपर्ने भए पनि कोरोना महामारीका कारण ढिलाइ भएको बताइएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर