छाब्दी बाराही विद्यालयका ४० जना बालबालिकालाई न्यानो कपडा वितरण
दमौली : तनहुँको व्यास नगरपालिका–१२ स्थित छाब्दी बाराही आधारभूत विद्यालयका ४० जना बालबालिकालाई न्यानो कपडा वितरण गरिएको छ । नेकपा एकीकृत समाजवादी पार्टीकी केन्द्रीय सदस्य एवं तनहुँ जिल्ला इन्चार्ज तथा निवर्तमान संघीय सांसद कलीला खानको सक्रियतामा जद्रायद चैरिटी ह्यूमैनिटेरियन फाउण्डेशनको सहयोगमा न्यानो कपडा वितरण गरिएको हो ।
कार्यक्रममा नेकपा एसका जिल्ला कमिटी सदस्य हबीब खानले बालबालिकालाई न्यानो कपडा वितरण गरे। चिसो मौसममा बालबालिकाको स्वास्थ्य र सुरक्षा सुनिश्चित गर्ने लक्ष्यका साथ न्यानो कपडा वितरण गरिएको उनले बताए ।
कार्यक्रममा बालबालिकालाई एक थान ज्याकेट, एक थान स्वेटर, एक थान थर्मकोट, एक थान टोपी, एक थान गलाबन्दी, एक जोर पन्जा, एक जोर मोजा र एक थान सानो कम्बलसहितका सामग्री वितरण गरिएको थियो ।
विद्यालय व्यवस्थापन समितिका पूर्व अध्यक्ष गजेन्द्रराज पन्थले आयोजक संस्थाले गरेको सहयोगप्रति आभार व्यक्त गर्दै यस्तो सहयोगले ग्रामीण क्षेत्रका बालबालिकाको जीवनमा सकारात्मक प्रभाव पार्ने विश्वास व्यक्त गरे ।
