पृथ्वीराजमार्गको आँवुखैरेनी–जामुने सडक खण्डको काम अन्तिमचरणमा

तनहुँ : पृथ्वीराजमार्ग अन्तर्गत मुग्लिन–पोखरा खण्डलाई चार लेनमा बिस्तार गर्ने कार्य भइरहेको छ । वि.सं. २०२६ रेखाङ्कन गरिएको यस सडकलाई पूर्वी र पश्चिम खण्ड गरी दुई भागमा विभाजन गरी अहिले सडक बिस्तारको कार्यलाई तीब्रता दिइएको छ ।

पूर्वी खण्ड अन्तर्गत आँबुखैरेनी–जामुने खण्डको काम लगभग अन्तिमचरणमा पुगेको मुग्लिन–पोखरा सडक विस्तार योजनाले जनाएको छ। योजनाका इन्जिनियर विष्णु पाण्डेका अनुसार मार्च १५ गतेसम्म ८१ प्रतिशतको हाराहारीमा भौतिक प्रगति छ भने ६१.९ प्रतिशत आर्थिक प्रगति पुगेको छ ।

उनले भने, ‘योजना अन्तर्गत पूर्वी खण्डमा दुई वटा ठेक्का रहेका छन् । एउटा आँबुखैरेनी–जामुने सडक स्तरोन्नती र अर्को मादी नदीमा पुल निर्माण गर्ने कार्यको ।’

सडक स्तरोन्नती अन्तरगत साना र ठुला गरी १७ वटा पुल निर्माणको जिम्मा रहेकोमा डुम्रेस्थित पिप्ले खोलाको पुल निर्माणाधिन अवस्थामा रहेको र अन्यको निर्माण सम्पन्न भएको उनले बताए । ४१.४५ किलोमिटर दुरी रहेको पूर्वी खण्डमा ७३.६३ किलोमिटर एकतर्फी सडक पहिलो तहको कालोपत्र भएको छ। उनले भने, ‘यस खण्डमा करिव ३६ किलोमिटर ४ लेन र १.६३ किलोमिटर २ लेन सडक कालोपत्र गरिएको छ ।’

यस्तै, २७.५२ किलोमिटर ४ लेन, ४.६६ किलोमिटर २ लेन गरी ६० किलोमिटर सडक एकतर्फी दोस्रो तहको कालोपत्र भएको पूर्वी खण्डका इन्जिनियार पाण्डेले बताए। ‘दमौली बजार, छिर्कन खण्ड, डुम्रे बजार, बिमलनगरको चुनपहरा खण्डमा काम बाँकी रहेको र यहिले यीनै खण्डलाई प्राथमिकतामा राखेर काम गरिरहेका छौं’, उनले भने, ‘दमौली बजार क्षेत्रमा कालोपत्रे गर्नलाई तीव्रता दिएका छौं। छिर्कन क्षेत्रमा हप्तादश दिनमा कालोपत्रे सम्पन्न हुने र बिमलनगरमा मस्र्याङ्दी नदी किनारबाट वल उठाउने कामलाई तीब्रता दिइएको छ ।’

यस्तै, मुआब्जा बितरणको काम पनि क्रमबद्ध रुपमा भइरहेको योजनाले जनाएको छ । दमौली बजार क्षेत्रमा राइट अफ वेमा आएका ७५ वटा भौतिक संरचना भत्काउनु पर्नेमा २५ जनाको बाँकी रहेको पाण्डेले बताए। उनले भने, ‘२५ जनामध्ये १४ जनाले पहिलो किस्तापनि लगेका छैनन् । दमौली बजार क्षेत्रका लागि ५ करोड २२ लाख रुपैयाँ मुआब्जा निधारण गरिएको छ ा’

पुर्वी खण्डमा ८०५ भौतिक संरचना भत्काउनु पर्नेमा डुम्रे र दमौली बजार क्षेत्रका केही भौतिक संरचनाहरु मात्रै बाँकी रहेको बताइएको छ । योजनाले करिव २९ करोड ८५ लाख रुपैयाँ मुआब्जा निर्धारण गरेकोमा २५ करोड ४५ लाख रुपैयाँ भुक्तानी गरिसकेको छ ।

वि.सं. २०८१ वैशाखसम्म काम सक्ने गरी चाइना कम्युनिकेसन कन्स्ट्रक्सनले ६ अर्ब २१ करोड ३१ लाख १३ हजार रुपैयाँमा पूर्वी खण्डको ठेक्का सम्झौता गरेको थियो । तर, तोकिएको समय अवधिभित्र काम सम्पन्न नभएपछि तेश्रोपटक म्याद थप गरी कामलाई निरन्तरता दिइएको छ ।

यस्तै, सन् २०२५ सेप्टेम्बरमा काम सक्ने गरी एक अर्ब २१ करोड रुपैयाँमा मादी पुलको ठेक्का ११ अगष्ट २०२२ मा सम्झौता भएको थियो। पुलको भौतिक प्रगति ६७.५८ प्रतिशत र आर्थिक प्रगति ५६.३४ प्रतिशत छ ।

पुल निर्माणका लागि फाउन्डेसन, पाइल र सवस्टक्चर, पिल्लर सम्बन्धी सम्पूर्ण काम सम्पन्न भईसकेको छ । सुपर स्टक्चरमा ६ वटा स्पान हुनेमा ३ वटाको ढलान सम्पन्न र एउटाको काम हुँदैछ । बाँकी दुई वटा नेटवोर्क आर्च प्रविधिमा बन्ने भएकाले वर्षायाम नजिकिएकाले उक्त काम आगमी आर्थिक वर्षपछि मात्र सुरु गर्ने योजनाले जनाएको छ ।

यस्तै, पश्चिम खण्डको सडक विस्तार गर्न २०७८ जेठ ३ गते सम्झौता भएको थियो । तोकिएको समयमा काम नसकिएपछि आगामी मध्य पुससम्म म्याद थपिएको पश्चिम खण्डका इन्जिनियर कृष्ण बहादुर कुँवरले बताए ।

जामुने–पोखरा ३८ किलोमिटर सडक विस्तारका लागि पनि चिनियाँ कम्पनी एनहुई केयुयन हाइवे एन्ड ब्रिजले ७ अर्ब ४० करोड रूपैयाँमा (सेती पुलबाहेक) ठेक्का सम्झौता गरेको थियो । ३८.८८ किलोमिटर दुरी रहेको पश्चिम खण्डको ४५.०४ प्रतिशत भौतिक प्रगति र ३१.५४ प्रतिशत आर्थिक प्रगति भएको इन्जिनियर सौजन्य नेपालले बताए । उनका अनुसार १५.६४ किलोमिटर चार लेन र १६.१९ किलोमिटर २ लेन गरी ३१.८४ किलोमिटर एकतर्फी प्रथम तहको कालोपत्र सम्पन्न भएको छ ।

‘पश्चिम खण्डमा निर्माण गर्नुपर्ने १२ वटा पुलमध्ये ५ वटा पुल सम्पन्न भएको छ भने अरु निर्माणधिन अवस्थामा छन्’, उनले भने, ‘सेति पुल निर्माणको काम पनि तीव्रताका साथ चलिरहेको छ । पुलमा १२० वटा पाईल, ४ वटा पाइल क्याम निर्माण गर्नुपर्नेमा सबै सम्पन्न भएको र ४ वटा टावर मध्ये ३ वटा टावर निर्माणको काम पनि सम्पन्न भएको छ ।’

सेती पुल निर्माणका लागि रसुवा कन्स्ट्रक्सन कम्पनी प्रा.लि काठमाडौंसंग ७ सेप्टेम्वर २०२२ मा एक अर्ब ७ करोड रूपैयाँमा छुट्टै सम्झौता भएको थियो । पुलको भौतिक प्रगति ४३.०२ प्रतिशत र आर्थिक प्रगति ३४.१४ प्रतिशत भएको योजनाले जनाएको छ ।