रिस्तीको मतपेटीका दमौली ल्याइएसंगै व्यास नगरपालिकाको मतगणना सुरु
भञ्ज्याङ न्यूज
तनहुँको व्यास नगरपालिका-८ रिस्तीमा बुधबार भएको पुनः मतदान शान्तिपूर्ण रुपमा सकिएको छ । बिहान ७ बजेदेखि सुरु भएको मतदान बेलुका ५ बजेसम्म सञ्चालन भएको थियो । रिस्ती गाविस भवन फेदी (क) र (ख) मा भएको मतदानका क्रममा ९९५ मत खसेको मतदान अधिकृत नारायणप्रसाद ढकालले बताए ।
रिस्तीको (क) मतदान केन्द्रमा ७५६ र (ख) मतदान केन्द्रमा ८२० मतदाता रहेका थिए । गत वैशाख ३० गते भएको निर्वाचनका क्रममा ९२२ मत खसेको थियो ।
स्थानीय तह निर्वाचनमा व्यास नगरपालिकाका प्रमुख उम्मेदवार दीपकराज जोशीमाथि आक्रमण भएपछि निर्वाचन आयोगले रद्द गरेको पुनः मतदान भएको हो । पुनः मतदान कार्यलाई सुरक्षित बनाउन सुरक्षा व्यवस्था चुस्त बनाइएको थियो ।
जिल्ला प्रशासन कार्यालय तनहुँले मतदान केन्द्रमा अनधिकृत व्यक्तिलाई प्रवेश निषेध गरेको थियो भने मतदान केन्द्रभित्र मतदाता, उम्मेदवार र निजको प्रतिनिधि, निर्वाचनमा खटिएका कर्मचारी, अनुमत्रि्राप्त व्यक्ति वा संस्थाका प्रतिनिधि र सुरक्षामा खटिएका कर्मचारीबाहेक अन्य व्यक्तिलाई प्रवेश निषेध गरिएको थियो ।
यस्तै, रिस्तीको मतदान कार्य सम्पन्न भएसंगै व्यास नगरपालिकाको मतगणना बुधबार साँझ ९ बजेबाट सुरु गरिएको छ । मुख्य निर्वाचन अधिकृतको कार्यालयमा बुधबार बसेको सर्वदलीय बैठकले व्यास-८ रिस्ती फेदीको मतपेटिका दमौली आएलगत्तै मतगणना प्रक्रिया अगाडि बढाउने सहमति अनुसार अगाडि बढिएको बताइएको छ ।
जिल्ला समन्वय समितिको कार्यालयमा चार ठाउँमा मतगणना स्थल बनाइएको र चार वटा वडाको एकैसाथ गणना हुने सहायक निर्वाचन अधिकृत कृष्ण गौतमले जानकारी दिए । पहिलो चरणमा वडा नं. १, २, ३ र ४ को मतगणना अगाडि बढाइएको छ ।
