गोली र लागुऔषध सहित तीन पक्राउ

तनहुँ प्रहरीले बन्दिपुर गाउँपालिका-१ पिप्लेबाट गोली र लागुऔषध सहित तीन जना पक्राउ गरेको छ । पक्राउ पर्नेमा बन्दिपुर गाउँपालिका-४ भैसीखाँ बस्ने २१ वर्षीय मनबहादुर गुरुङ, सोही वडाको चान्चा बस्ने ३० वर्षीय आशिष कायस्थ र भानु नगरपालिका-१ शुक्रखोला बस्ने ३० वर्षीय वर्षीय भरत तामाङ रहेको जिल्ला प्रहरी कार्यालय तनहुँले जनाएको छ ।

प्रहरीले भरत तामाङको घरबाट ७.६२ एमएफएस २००१ लेखिएको राइफलमा प्रयोग हुने हतियारको गोली र अन्य दुइ जनाको साथबाट लागुऔषध बरामद गरेको प्रहरी निरीक्षक नरहरि अधिकारीले जानकारी दिए । प्रहरीले भरतको घर खानतलासी गर्दा दुइ थान हतियारको गोली बरामद गरेको छ ।

त्यस्तै निजकै घरबाट एक एम्पुल नुफिन, एक एम्पुल डाइजेपाम, एक एम्पुल फेनरागन, चार थान सिरिन्ज बरामद गरेको छ । यसैगरी मनबहादुरको साथबाट नुफिन १७ एम्पुल, डाइजेपाम १७ एम्पुल र फेनरागन१७ एम्पुल लागुऔषध बरामद भएको छ । आशिषको साथबाट नुफिन दुइ एम्पुल, डाइजेपाम दुइ एम्पुल र फेनरागन दुइ एम्पुल बरामद भएको छ । पक्राउ परेकामध्ये भरत लागुऔषध विक्री वितरणमा संलग्न रहेको खुलेको छ । पक्राउ परेका तीन जना विरुद्ध अदालतबाट म्याद थप गरी अनुसन्धान भइरहेको प्रहरीले जनाएको छ ।

चोर पक्राउ

यस्तै, तनहुँको व्यास नगरपालिका-२ स्थित लोकप्रिय स्वास्थ्य क्लिनिकमा चोरी गर्ने एक जना पक्राउ परेका छन् । पक्राउ पर्नेमा भानु नगरपालिका-१ नयाँबस्ती बस्ने २० वर्षीय सुजन परियार रहेको जिल्ला प्रहरी कार्यालय तनहुँले जनाएको छ । गत असार ३२ गते राति स्वास्थ्य क्लिनिकको सटर फोडी नगद एक लाख ३५ हजार रुपैयाँ चोरी गरेर फरार रहेका उनीहरुले पुनः आइतबार राति सोही स्वास्थ्य क्लिनिकमा चोरी प्रयास गरेका थिए ।

सिसिटिभी फुटेलको हुलियाका आधारमा खोजतलास गर्दै जाँदा आइतबार राति ९:३० बजे पुनः स्वास्थ्य क्लिनिक तोडफोड गर्दै गरेको अवस्थामा स्थानीय व्यक्तिको सहयोगमा उनीहरुलाई पक्राउ गरिएको प्रहरी नायब उपरिक्षक युवराज खड्काले जानकारी दिए । पक्राउ परेकाविरुद्ध सोमबार तनहुँ अदालतबाट दश दिनको म्याद थप गरिएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर